वर्धा (जिल्हा प्रतिनिधी मनोज बाचले) – कर्ज मिळवून देण्याच्या बहाण्याने गुजरातच्या व्यापाऱ्याची ८५ लाखांनी फसवणूक करण्यात आली. या प्रकरणी अजनी पोलिसांनी पाच जणांविरुद्ध फसवणुकीचा गुन्हा दाखल केला आहे.
मुकेश ताराचंद गांधी (वय ४८, रा. भगवतीनगर), प्रमोद ऊर्फ पप्पू क्रिष्णकुमार अवस्थी (रा. जगनाडे चौक), सुलतान भाई (रा. मुंबई), मेहंदीसिंग सत्तसिंग (रा. मुंबई) आणि शब्बीर भाई (रा. राजकोट) अशी गुन्हा दाखल करण्यात आलेल्यांची नावे आहेत. परेश हरगोविंददास पटेल (वय ५७, रा. कपळगंज, गुजरात) यांनी दिलेल्या तक्रारीवरून हा गुन्हा दाखल करण्यात आला.
पोलिसांनी दिलेल्या माहितीनुसार , परेश हे उद्योजक आहेत. त्यांना गुजरातमध्ये शीतगृह उभारायचे असल्याने ६० कोटी रुपयांचे कर्ज हवे होते. एका मध्यस्थामार्फत परेश यांची शब्बीरसोबत ओळख झाली. नागपुरातील काही साथीदार कंपनीच्या समभागांची बाजारात विक्री करून ६० कोटी रुपये मिळवून देतील, असे आमिष शब्बीरने परेश यांना दाखविले.
शब्बीरने मुकेश, पप्पू व अन्य आरोपींसोबत परेश यांची ओळख करून दिली. कर्ज मिळवून देण्यासाठी एक कोटी रुपये खर्च व भांडवलावर ३ टक्के दलाली द्यावी लागेल, असे आरोपींनी परेश यांना सांगितले. आरोपींनी ५ जून ते ५ ऑगस्ट २०१८ यादरम्यान परेश यांच्याकडून वेळोवेळी एकूण ८५ लाख रुपये घेतले. मात्र, त्यांनी परेश यांना कर्ज मिळवून दिले नाही. अजनी भागात पिस्तूलचा धाक दाखवून पैसे परत मागितल्यास ठार मारण्याची धमकी दिली. परेश यांनी गुन्हे शाखेकडे तक्रार दिली. गुन्हेशाखेने तपास करून अजनी पोलिस स्टेशनमध्ये गुन्हा दाखल केला.
