कोझिकोड – केरळमधील अठोली पोलिसांनी एका रुग्णालयातील कर्मचाऱ्याला बेड्या ठोकल्या आहेत. कोविड रुग्णालयात करोनाची लागण झालेल्या एका महिला रुग्णावर बलात्कार करण्याचा त्याचावर आरोप आहे. हे प्रकरण उल्लियरीमधील मालाबार मेडिकल कॉलेजमधील आहे.
आरोपीचे नाव अश्विन कृष्णा असे असल्याचे पोलिसांनी सांगितले. तो चेलानूरचा रहिवासी आहे. अश्विन कृष्णावर विविध कलमांखाली कारवाई करण्यात येऊन त्याची रवानगी तुरुंगात करण्यात आली आहे. हे प्रकरण उघड झाल्यानंतर रुग्णालय प्रशासनाने आरोपी अश्विन कृष्णाला निलंबित केले आहे. अश्विन हा रुग्णालयातील खरेदी विभागात काम करत होता. त्याला नर्सिंग कॉलेजच्या इमारतीत सुरू असलेल्या कोविड रुग्णालयात तैनात करण्यात आले होते, अशी माहिती रुग्णालय प्रशासनाने दिली.
रुग्णालयात महिलेला गुरुवारी संध्याकाळी दाखल केले गेले होते तिच्या आई-वडिलांना देखील करोनाची लागण झाल्याचे स्पष्ट झाल्यानंतर याच रुग्णालयात दाखल करण्यात आले. आरोपीने प्रथम तिचा फोन नंबर घेतला. हा मोबाइल नंबर रुग्णालयाच्या रेकॉर्डमध्ये नोंद केला जाणार असल्याचे आरोपीने आपल्याला सांगितल्याचे महिलेचे म्हणणे आहे.
त्यानंतर अश्विन या महिलेला व्हॉट्सअपवर मेसेज पाठवू लागला. पुढे तो तिला फोनही करू लागला सुरुवातीला याकडे महिलेने दुर्लक्ष केले. रविवारी रात्री सुमारे १० वाजून ४० मिनिटांच्या सुमारास त्याने डॉक्टर बोलावत असल्याचे महिलेला सांगितले, असे पीडित महिलेने सांगितले.
आरोपीने पीडित महिलेला चौथ्या मजल्यावर नेले. तेथे त्याने तिच्यावर बलात्कार करण्याचा प्रयत्न केला. पीडित महिला आरडाओरड करत तेथून पळाली आणि तळमजल्यावर येऊन तिने आपल्या आई-वडिलांना घडलेला प्रकार सांगितला.
हे प्रकरण सार्वजनिक झाल्यानंतर राजकीय पक्षांनी रुग्णालयाबाहेर निदर्शने सुरू केली. प्रकरण महिला आयोगापर्यंत पोहोचले. या प्रकरणात कठोर कारवाई करण्याचे निर्देश महिला आयोगाने जिल्हा प्रशासनाला दिले. आरोपीविरोधात गुन्हा नोंदवण्यात आला आणि त्यानंतर आरोपीला अटक करण्यात आली.
