गुवाहाटी – आसाममध्ये एका पत्रकाराला विजेच्या खांबाला बांधून मारहाण झाल्याची घटना घडलीय. या बातमीचे फोटो आणि व्हिडिओ सोशल मीडियावर व्हायरल झाल्यानंतर ही घटना जगासमोर आलीय. स्थानिक मीडियानं दिलेल्या माहितीनुसार, ही घटना पत्रकारानं भूमाफियांवर केलेल्या बातमीनंतर ही मारहाण करण्यात आलीय.
पत्रकाराला झालेल्या मारहाणीचा समोर आलेला व्हिडिओ अत्यंत धक्कादायक आहे. या व्हिडिओत दिसणाऱ्या पत्रकाराचं नाव मिलन महंता असं आहे. मिलन हे आसाममधील ‘प्रतिदिन’ नावाच्या एका प्रतिष्ठीत वर्तमानपत्राशी संबंधित आहेत. व्हिडिओमध्ये पत्रकाराचे हात बांधून त्याला खांबाला बांधून टाकण्यात आल्याचं दिसतंय.
या संपूर्ण घटनेचं व्हिडिओ चित्रीकरण करण्यात आलं. मिलन महंता रस्त्याच्या बाजुलाच असलेल्या एका दुकानापाशी थांबलेले असताना काही जणांनी त्यांना अचानक घेरलं. त्यानंतर त्यांना विजेच्या खांबाला बांधून मारहाण करण्यात आली. व्हिडिओत पाच व्यक्ती पत्रकाराला मारहाण करताना दिसत आहे. ही घटना गेल्या रविवारी मिर्झा खोऱ्यात घडली. हा भाग राजधानी गुवाहाटीपासून पश्चिमेला जवळपास ४० किलोमीटर अंतरावर आहे.
या हल्ल्यात मिलन महंता यांच्या गळ्यावर, डोक्याला आणि कानाला गंभीर दुखापत झालीय. त्यांनी पलाश बारी पोलीस स्टेशनमध्ये जाऊन या घटनेची तक्रार नोंदवली आहे. झुगाऱ्यांनी आपल्यावर हा हल्ला केल्याचं महंता यांनी आपल्या तक्रारीत म्हटलंय.दिवाळी दरम्यान महंता यांनी आसाममध्ये या भागात वाढत्या झुगाराच्या अड्ड्यांविरोधात माहिती देताना एक संपूर्ण सीरिज केली होती.
पत्रकारानं दाखल केलेल्या तक्रारीनंतर पोलिसांकडून एका व्यक्तीला अटक करण्यात आलंय. इतर आरोपींचा शोध सुरू असल्याचं पोलिसांनी म्हटलंय. पत्रकारावरच्या हल्ल्याचा निषेध करण्यासाठी बुधवारी काही पत्रकारांनी आंदोलनही केलं. हल्लेखोरांविरोधात कठोर कारवाईची मागणी त्यांच्याकडून करण्यात आलीय.
