ठाणे (उपसंपादक सतीश बनसोडे) – शहरातील राबोडी भागात मनसे पदाधिकारी जमील शेख यांची भररस्त्यात गोळी झाडून हत्या करण्यात आल्याने एकच खळबळ उडाली आहे. जमील हे बाइकवरून निघाले असताना त्यांच्यावर मागून एक गोळी झाडण्यात आली. ही गोळी वर्मी लागल्याने त्यांचा मृत्यू झाला आहे.
राबोडी परिसरात आज भरदुपारी ही धक्कादायक घटना घडली. जमील शेख हे बाइकवरुन निघाले होते. त्यावेळी पाठीमागून बाइकवरून आलेल्या दोन जणांपैकी बाइकवर मागे बसलेल्या एकाने जमील यांच्यावर गोळी झाडली. ही गोळी डोक्याच्या मागे वर्मी लागल्याने जमील हे बाइकसह खाली कोसळले. हा प्रकार पाहून तेथे आजूबाजूला असलेले सगळेच हादरले. त्यानंतर तातडीने जमील यांना रुग्णालयात नेण्यात आले. मात्र, रुग्णालयाच्या वाटेवर असतानाच जमील यांचा मृत्यू झाला. जमील हे मनसेचे राबोडी प्रभाग अध्यक्ष होते. जमील यांच्यावर गोळ्या झाडून हल्लेखोर पसार झाले असून हल्लेखोरांना पकडण्यासाठी पोलिसांची तीन पथके तयार करण्यात आली आहेत. त्याचवेळी आरोपींचा गुन्हे शाखेकडूनही शोध घेण्यात येत आहे. शवविच्छेदनासाठी जमील यांचा मृतदेह मुंबईतील जे. जे. रुग्णालयात पाठवण्यात आला आहे. शवविच्छेदनाचा अहवाल आल्यानंतर त्यातून पोलिसांच्या हाती महत्त्वाचे धागेदोरे येण्याची शक्यता आहे.
ठाणे शहरातील राबोडी परिसर नेहमीच गजबजलेला असतो. या भागात रस्त्यांवरून वाहनांची मोठ्या प्रमाणात वर्दळ असते. असे असताना दिवसाढवळ्या येथे जमील शेख यांच्यावर जीवघेणा हल्ला करण्यात आल्याने एकच खळबळ उडाली आहे. या हल्ल्यानंतर ठाण्यातील कायदा-सुव्यवस्थेचा प्रश्नही ऐरणीवर आला आहे.
ठाणे जिल्ह्यात गेल्या महिनाभरात मनसेच्या दोन पदाधिकाऱ्यांच्या हत्या झाल्या आहेत. जमील शेख यांच्याआधी अंबरनाथ येथील मनसेचे शहर उपाध्यक्ष राकेश पाटील यांचीही हत्या करण्यात आली होती. पालेगाव परिसरात २७ ऑक्टोबर रोजी राकेश यांच्यावर धारदार शस्त्राने वार करण्यात आले होते. त्यात गंभीररित्या जखमी झालेल्या पाटील यांना रुग्णालयात दाखल करण्यात आले पण त्याआधीच त्यांचा मृत्यू झाला होता. याप्रकरणी मुख्य आरोपीसह पाच जणांना अटक करण्यात आलेली आहे. या हत्यासत्राने ठाण्याच्या राजकीय वर्तुळातही खळबळ माजली आहे.
