लखनौ (विशेष प्रतिनिधी) – कोरोनाचा प्रादुर्भाव रोखण्यासाठी लागू केलेल्या लॉकडाऊनच्या काळात बंद असलेल्या शाळा-महाविद्यालये पुन्हा सुरू न केल्यामुळे विद्यार्थ्यांचे नुकसान होत असल्याचे सांगत एका विद्यार्थ्याने उत्तर प्रदेशचे मुख्यमंत्री योगी आदित्यनाथ यांना मेसेज करून धमकी दिली. विद्यार्थ्याच्या क्रमांकावरून हा मेसेज नियंत्रण कक्षाला मिळाल्यानंतर अधिकाऱ्यांमध्ये खळबळ उडाली. अधिकाऱ्यांच्या निर्देशानंतर पोलिसांनी तातडीने संबंधित विद्यार्थ्याला आग्रा येथून अटक केली.
डीसीपी (दक्षिण) रईस अख्तर यांनी याबाबत माहिती दिली. सोमवारी उत्तर प्रदेश पोलिसांच्या ११२ या क्रमांकावर एक मेसेज आला. शाळा-कॉलेज सुरू न केल्याने विद्यार्थ्यांचे नुकसान होत असल्याचे सांगत मुख्यमंत्री योगी आदित्यनाथ यांना धमकी दिली होती. मेसेज मिळाल्यानंतर पोलीस सतर्क झाले. लखनऊ पोलिसांनी मोबाईल क्रमांकाची माहिती घेतल्यानंतर विद्यार्थी आग्रा येथील असल्याचे समजले.
आग्रा येथे जाण्यापूर्वी पोलिसांनी लखनऊतील सुशांत गोल्फ सिटी पोलीस ठाण्यात अज्ञात व्यक्तीविरोधात धमकी आणि आयटी अॅक्ट अंतर्गत विविध कलमान्वये एफआयआर दाखल केला होता. पोलिसांनी आग्रा येथून विद्यार्थ्याला ताब्यात घेतले. विद्यार्थी अल्पवयीन असल्याने पोलिसांनी त्याची चौकशी सुरू केली. मुख्यमंत्र्यांच्या नावाने सहजच मेसेज पाठवला होता, असे विद्यार्थ्याने पोलिसांना सांगितले. शाळा बंद असल्याने मुलांचे नुकसान होत असल्याचे तो म्हणाला. पोलिसांनी मोबाइल आणि सीमकार्ड जप्त केला असून, विद्यार्थ्याची रवानगी बालसुधारगृहात केली आहे.
