पुणे (प्रतिनिधी सुनिल भोसले) – संपत्तीच्या वादातून मुलाने वडिलांवर चाकू हल्ला करून त्यांना जखमी केले, तर सुनेने सासूला दांडक्याने मारहाण करून फ्रॅक्चर केले. खडकी येथील गवळीवाडा येथील जुन्या तालीमशेजारी दोन दिवसांपूर्वी ही घटना घडली.
कपिल पुरणचंद आहेर (३६) आणि निशा कपिल आहेर (३०) अशी गुन्हा दाखल करण्यात आलेल्यांची नावे आहेत. या प्रकरणी पुरणचंद आहेर (६८, रा. खडकी) यांनी खडकी पोलिस ठाण्यात तक्रार दिली आहे.
खडकीतील जुनी तालीम परिसरात राहणाऱ्या आहेर कुटुंबीयांत काही महिन्यांपासून मुलगा कपिल आणि वडील पुरणचंद यांच्यात संपत्तीवरून वाद सुरू आहेत. आहेर यांच्या राहत्या घराशेजारी कडबाकुट्टी कापणी मशिन असून, तेथे पुरणचंद यांना गायीचा गोठा करायचा होता. त्यासाठी त्यांनी खडकी कॅन्टोन्मेंट बोर्डाकडे कापणी मशिन काढण्यासाठी अर्ज केला होता. त्याची माहिती कपिलला मिळाल्यामुळे त्याने वडिलांवर चाकू हल्ला करून जखमी केले. निशा यांनी पुरणचंद यांच्या पत्नीला दांडक्याने मारहाण करून जखमी केले, अशी माहिती पोलिसांनी दिली. अधिक तपास पोलिस उपनिरीक्षक संभाजी तांबे करीत आहेत.
