नाशिक (विशेष प्रतिनिधी) – शेजारी राहणाऱ्याकडून एका आठ वर्षीय बालकाचे अपहरण करून त्याची हत्या केल्याची खळबळजनक घटना नाशिकरोड येथे घडली. रामजी लालबाबू यादव (रा गाडेकर मळा, सामनगाव रोड, नाशिकरोड) असे हत्या झालेल्या मुलाचे नाव आहे. या मुलाची हत्या करून त्याचा मृतदेह संशयिताने डूबेरे, (ता सिन्नर) येथील स्मशानभूमी परिसरात टाकून दिला होता.
संपूर्ण सिन्नर शहराला हादरविणाऱ्या या घटनेतील संशयितांनी हत्या झालेल्या मुलाचे त्याच्या राहत्या घरून भाजीपाला आणण्याच्या नावाखाली मंगळवारी सायंकाळी चार वाजेच्या सुमारास एका चारचाकी वाहनातून अपहरण केले होते. त्यानंतर संशयिताने दुसऱ्या एका साथीदाराच्या साहाय्याने या मुलास कोटमगाव, हिंगणवेढे रस्त्याने सिन्नरच्या दिशेने नेले.
रस्त्यात एका सुरक्षारक्षकाला लुटले. ही घटना घरी सांगतो असे रामजी यादव हा मुलगा म्हणाला. चोरी उघडकीस येईल या भीतीने संशयिताने रामजी यादव या मुलाची हत्या केली आणि त्याचा मृतदेह डुबेरे येथील नदीत टाकल्याची प्राथमिक माहिती समजते. या घटनेची माहिती मिळताच पोलीस उपायुक्त, सहाय्यक पोलीस आयुक्त, नाशिकरोड पोलीस ठाण्याचे वरिष्ठ पोलीस अधिकारी, फॉरेन्सिक लॅबचे पथक यांनी मयत मुलाच्या घरी भेट देऊन तपासाच्या सूचना केल्या.
