उज्जैन – मध्य प्रदेशच्या उज्जैनमधील पोलीस कॉन्स्टेबलने लग्नाच्या भूलथापा देत एका तरुणीवर दोन वर्षे अत्याचार केल्याची घटना उघडकीस आली. पीडितेसोबत प्रेमसंबंध असलेला हा पोलीस कॉन्स्टेबल अन्य एका तरुणीशी लग्न करणार होता. याबाबत पीडित तरुणीनं विचारणा केली असता, तो तिला धमकावू लागला. तरुणीने अखेर पोलीस ठाण्यात तक्रार दाखल केल्यानंतर कॉन्स्टेबलला अटक केली.
मिळालेल्या माहितीनुसार, उज्जैन पोलीस लाइनमध्ये सेवेत असलेल्या कॉन्स्टेबलने एका तरुणीला लग्नाच्या भूलथापा देत तिच्यावर दोन वर्षे अत्याचार केले. मात्र, तो अन्य एका तरुणीसोबत लग्न करणार असल्याची माहिती काही दिवसांपूर्वी पीडितेला मिळाली. तिने त्याला जाब विचारला. त्यावर त्याने तिला मारहाण केली. तसेच धमकावू लागला. अखेर तरुणीने पोलीस ठाण्यात तक्रार दाखल केली. चिमणगंज पोलिसांनी कॉन्स्टेबलला अटक केली. त्याच्याविरोधात विविध कलमान्वये गुन्हा दाखल केला आहे.
पीडित तरुणी सार्थक नगरात भाड्याच्या खोलीत राहून स्पर्धा परीक्षेची तयारी करत होती. तिच्या शेजारीच आरोपी कॉन्स्टेबल अजय राहत होता. त्याने तरुणीशी मैत्री केली. तिला प्रेमाच्या जाळ्यात ओढले. लग्नाच्या भूलथापा देत त्याने तिच्यावर अत्याचार केले. तरुणीने लग्नाबाबत विचारणा केली. त्याने तिला नकार दिला. दुसऱ्या एका मुलीसोबत लग्न करणार असल्याचे त्याने सांगितले. पीडितेने पोलीस अधीक्षक सत्येंद्र कुमार शुक्ला यांच्याकडे अजयविरोधात तक्रार केली. त्यांनी दखल घेत चिमणगंज पोलिसांना कारवाईचे आदेश दिले. पोलिसांनी आरोपी अजयला अटक केली. त्याच्याविरोधात गुन्हा दाखल करण्यात आला आहे. या घटनेचा पुढील तपास सुरू आहे, असे पोलिसांनी सांगितले.
