उत्तर प्रदेश – उत्तर प्रदेशात योगी आदित्यनाथ सरकारकडून लागू करण्यात आलेल्या ‘लव्ह जिहाद’विरोधी कायद्यामुळे आणि या कायद्याची होत असलेल्या वादग्रस्त अंमलबजावणीमुळे आंतरधर्मीय विवाह करणारे जोडपे धास्तावलेले असतानाच राज्यात उघडकीस आलेल्या एका घटनेमुळे राज्यात आंतरजातीय विवाहांना होणारा पराकोटीचा विरोध चिंतेचा विषय ठरलाय.
आंतरजातीय विवाह करणाऱ्या एका तरुणीची तिच्या भावांनीच हत्या केल्याचं धक्कादायक वास्तव उत्तर प्रदेशातल्या मैनपुरी जिल्ह्यात उघडकीस आलंय.या तरुणीनं आपल्या पसंतीच्या तरुणासोबत प्रेमविवाह केला होता. कुटुंबीयांकडून होणारा विरोध पाहता या दोघांनी एका मंदिरात विवाह केला होता. आंतरजातीय विवाहाची किंमत या तरुणीला आपल्या प्राणाणं चुकवावी लागली.
विवाहानंतर मनात अत्यंत घृणा आणि चीड असलेल्या भावानं आपल्या बहिणीला विश्वासात घेऊन आपल्या गावी बोलावून घेतलं. इथे आपल्या इतर दोन भावांसोबत मिळून त्यानं आपल्या बहिणीची हत्या केली. ही हत्या उघड होऊ नये, यासाठी या तिन्ही भावांनी मिळून आपल्या बहिणीचा मृतदेह जमिनीत पुरून नष्ट करण्याचाही प्रयत्न केला.
माहेरी गेलेली पत्नी परतली नाही त्यामुळे तरुणीच्या पतीनं पोलिसांत तक्रार दाखल केली. यानंतर पोलिसांनी सुरू केलेल्या चौकशीत हे धक्कादायक सत्य उघडकीस आलं.आरोपींनी गुन्हा मान्य केल्यानंतर दिल्ली पोलिसांनी मैनपुरीला दाखल होत स्थानिक पोलिसांच्या मदतीनं शेतात जमिन खोदून तरुणीचा विघटन झालेला मृतदेह ताब्यात घेतला.
