इंदौर – मध्य प्रदेशातील एका सॉफ्टवेअर इंजिनीअर तरुणानं पाच दिवसांत दोन लग्ने केली. नातेवाईकानं त्याचं पितळ उघडं पाडताच, तरूण फरार झाला. विवाहितेच्या कुटुंबीयांनी त्याच्यावर फसवणुकीचा आरोप केला आहे. त्याच्याविरोधात पोलिसांत तक्रार केली असून, गुन्हा दाखल करण्यात यावा, अशी मागणी कुटुंबीयांनी केली आहे.
आरोपी २६ वर्षीय इंजिनीअर तरूण इंदूरच्या मुसाखेडी येथील रहिवासी आहे. त्याने २ डिसेंबरला खंडवातील एका तरुणीशी लग्न केलं. त्यानंतर ७ डिसेंबरला इंदूरमधील महू येथील एका तरुणीशी लग्न केलं. खंडवा येथील महिलेच्या कुटुंबीयांनी त्याच्याविरोधात फसवणुकीची तक्रार केली आहे.
त्या नवविवाहितेच्या कुटुंबीयांनी पोलिसांत तक्रार दाखल केली आहे. २ डिसेंबरला लग्न केल्यानंतर आरोपी सात डिसेंबरला महू येथे अन्य एका तरुणीशी लग्न करण्यासाठी गेला होता. या सोहळ्याला उपस्थित असलेल्या नातेवाईकाने लग्नाचे फोटो पाठवले. त्यानंतर कुटुंबीयांनी या तरुणाविरोधात पोलिसांत तक्रार दाखल केली.
तरूणाने दुसरे लग्न केले आहे. लग्नात १० लाख रुपये खर्च केले आहेत. हुंडा म्हणून त्याला बऱ्याच वस्तू दिल्या आहेत. लग्नानंतर मुलीला त्याने इंदूरला नेले होते. मात्र, तिथे गेल्यानंतर महत्वाच्या कामासाठी भोपाळला जात असल्याचे तिला सांगितले आणि महूमध्ये दुसरे लग्न करण्यासाठी निघून गेला. पोलिसांनी दिलेल्या माहितीनुसार, आरोपी तरूण हा आपले आईवडील आणि भाऊ-बहिणीसोबत महू येथे लग्नासाठी गेला होता. पितळ उघडे पडताच आरोपी ७ डिसेंबरलाच फरार झाला आहे. पोलीस त्याचा शोध घेत आहेत.
