नवी दिल्ली – दिल्ली पोलिसांच्या सायबर गुन्हे शाखेने दिल्लीतील पिरागढी येथील एका बोगस कॉल सेंटरचा भंडाफोड केला. पोलिसांनी या प्रकरणात ४२ जणांना अटक केली आहे. त्यात १६ महिला आहेत. याशिवाय पोलिसांनी कॉल सेंटरमधून ९० इलेक्ट्रॉनिक उपकरणे जप्त केली आहेत.
सायबर सेलच्या अधिकाऱ्यांनी दिलेल्या माहितीनुसार, आरोपी दिल्लीच्या पिरागढीमधून विदेशींना लक्ष्य करत होते. लॉ अँड एन्फोर्समेंट एजन्सी असल्याची बतावणी ते करत असत. मिळालेल्या माहितीनुसार, या आरोपींनी आतापर्यंत ३,५०० जणांना गंडा घातला आहे. त्यांची जवळपास ७० कोटींची फसवणूक केली आहे. हे सर्व आरोपी बऱ्याच काळापासून अशा प्रकारचे काम करत असावेत, असे त्यांच्याकडे सापडलेल्या इलेक्ट्रॉनिक उपकरणांवरून लक्षात येते, असेही अधिकाऱ्यांनी सांगितले.
पीरागढीमध्ये एक बोगस कॉल सेंटर सुरू असल्याची माहिती मिळाली होती. पोलिसांनी तात्काळ धाड टाकली. घटनास्थळी मालक आणि इतर ४० हून अधिक लोक होते. त्यात १६ महिलादेखील होत्या.
