नागपूर (प्रतिनिधी) – गोंदियातील शाळेत तीन अल्पवयीन मुलींचे लैंगिक शोषण करणाऱ्या शिक्षकाला मुंबई उच्च न्यायालयाच्या नागपूर खंडपीठाने सोमवारी तब्बल वीस वर्षांच्या सक्तमजुरीची शिक्षा ठोठावली आहे. शिक्षकाला यापूर्वी गोंदिया सत्र न्यायालयाने निर्दोष मुक्त केले होते. तो निकालही हायकोर्टाने रद्द केला. तसेच गोंदिया पोलिस अधीक्षकांना आरोपीला तातडीने अटक करण्याचे आदेश दिलेत.
गोंदियातील एका खासगी शाळेतील शिक्षक गोपाल निळकंठ जनबंधू याने शाळेतील तीन मुलींचे लैंगिक शोषण केले, अशी तक्रार दाखल करण्यात आली होती. याप्रकरणी पोलिसांनी आरोपी शिक्षक गोपाल जनबंधूच्या विरोधात भांदवीच्या कलम ३७६ (२ एफ)(आय) आणि(जे) ३५४अ आणि ३५४ ब तसेच पॉक्सो कायद्याच्या कलम ४,५,(सी) आणि ९ (एफ) अन्वये गुन्हा दाखल केला होता.
दरम्यान, पिडीत मुलींच्या बयाणांमध्ये तफावत असल्याचे कारण देत अतिरिक्त सत्र न्यायाधीशांनी ५ जानेवारी २०१९ रोजी आरोपी गोपाल जनबंधू याची निर्दोष मुक्तता केली होती. त्या निर्णयाला आव्हान देणारी याचिका राज्य सरकारने हायकोर्टात दाखल केली. त्यावर न्या. झेड. ए. हक आणि न्या. अमित बोरकर यांच्या खंडपीठासमोर सुनावणी झाली. सत्र न्यायालयाने अत्यंत असंवेदनशीलपणे खटला चालवल्याची परखड टीका हायकोर्टाने केली. पिडीत मुलींच्या मानसिकतेवर या घटनेने प्रचंड परिणाम झाला. त्यांनी कोणत्या यातना सहन केल्या त्याकडे सत्र न्यायालयाने दुर्लक्ष केले, असे निकालात नमूद केले. त्यामुळे आरोपी गोपाल याला वीस वर्षांच्या कारवासाची शिक्षा ठोठावण्यात येत आहे. त्यातील दहा वर्षे त्याला पॅरोल अथवा फर्लो मिळणार नाही, आरोपीला एक लाख ८० हजाराचा दंड, दंड न भरल्यास मालमत्ता विकून दंड जमा करावा लागेल. तरीही दंड न जमा केल्यास त्याला कधीही पॅरोल व फर्लो मिळणार नाही, असे निकालात नमूद केले आहे. याप्रकरणी राज्य सरकारच्या वतीने सरकारी वकील केतकी जोशी यांनी बाजू मांडली.
