पुणे (प्रतिनिधी सुनिल भोसले) – रेस्टॉरंटमध्ये जेवणानंतर बडीशेपेसोबत खडीसाखर मागणाऱ्या एका चार वर्षांच्या मुलाला वेटरने वॉशिंग सोड्याचा खडा दिल्याची विचित्र घटना गेल्या रविवारी शहरात घडली आहे. या घटनेत मुलाचे तोंड आणि जीभ पूर्णपणे पोळली असून, त्याला तातडीने उपचारांसाठी रुग्णालयात दाखल करावे लागले. या प्रकारानंतर मुलाच्या आजोबांनी हॉटेलमालक आणि संबंधित वेटरविरोधात दत्तवाडी पोलिस ठाण्यात तक्रार दाखल केली आहे.
रमेश कोष्टी असे तक्रारदाराचे नाव आहे. कोष्टी यांनी रविवारी सायंकाळी विहान आणि त्याचा अकरा वर्षांचा मोठा भाऊ कुबेर या नातवंडांना सारसबागेत खेळायला नेले होते. त्यानंतर हे तिघेही ‘हॉटेल विश्व’मध्ये नाश्ता करण्यासाठी गेले. नाश्ता झाल्यानंतर विहानने खडीसाखर खाण्यासाठी मागितली. वेटरने बडीशेपेच्या डब्यात खडीसाखर आणून दिली. ती विहानने खाल्यावर तो मोठ्याने ओरडला आणि तोंडावरून हात फिरवू लागला. त्यानंतर रमेश कोष्टी यांनी बडीशेपेच्या डब्यातील खडीसाखर चाटून पाहिली असता, त्यामध्ये धुण्याच्या सोड्याचे खडे असल्याचे आढळून आले. ‘विहानला आम्ही तातडीने हॉटेलबाहेर आणून, पाण्याने चूळ भरायला सांगितले. मात्र, त्याचे तोंड खूप लाल झाले होते आणि त्याला बोलताही येत नव्हते. त्याला प्रचंड त्रास होत असल्याने जवळच्या दवाखान्यांचा शोध घेतला. मात्र, रविवारमुळे दवाखाने सुरू नसल्याने शेवटी दीनानाथ मंगेशकर रुग्णालयात दाखल केले. त्यानंतर सोमवारी संबंधित वेटर आणि हॉटेल मालकाविरोधात दत्तवाडी पोलिस ठाण्यात तक्रार नोंदविण्यात आली आहे.
अशा प्रकारची घटना प्रथमच निदर्शनास आली असून, त्याला ‘अल्कली बर्न’ म्हणतात,’ असे दीनानाथ मंगेशकर रुग्णालयाच्या बालरोग अतिदक्षता विभागाचे प्रमुख डॉ. सुमंत पाटील यांनी सांगितले. ‘विहानला रुग्णालयात आणले असता, त्याच्या तोंडात भरपूर अल्सर दिसत होते. तोंडात, जिभेवर, घशाच्या मागील बाजूला जळाल्यासारखे (बर्न) दिसत झाले होते. हा प्रकार आजोबांच्या लक्षात आल्यावर त्यांनी विहानला चूळ भरायला सांगितले. त्यामुळे संबंधित पदार्थ त्याच्या शरीरात गेला नाही. चुकून हा पदार्थ पोटात गेला असता, तर अल्कली शरीरातील ‘म्युकस मेंब्रेन’च्या (पचन संस्था व श्वसन संस्थेच्या आतील भागातील चिकट आवरण) संपर्कात येऊन अन्न व श्वसन नलिका ‘बर्न’ झाली असती. त्यामुळे खबरदारी म्हणून ‘गॅस्ट्रोएन्ट्रोलॉजिस्ट’नी अन्न नलिकेची तपासणी केली. सुदैवाने गंभीर परिस्थिती नसल्याने, रुग्णाला दोन दिवसांत उपचार देण्यात आला,’ असेही त्यांनी सांगितले.
