खुलताबाद (प्रतिनिधी सलमान खान) – औरंगाबाद येथील औरंगपुऱ्यातील पिया मार्केटमध्ये क्षुल्लक वादातून अवघ्या ३५ सेकंदाच्या बाचाबाचीत तिघांनी चाकूहल्ला चढवत रेकॉर्डवरील गुन्हेगाराचा खून केला. समीर खान सिकंदर खान (वय २७, रा. टाऊन हॉल, आसेफिया कॉलनी) असे मृताचे नाव असून त्याच्यावर अपहरण, विनयभंगासह अन्य गुन्हे दाखल होते. ही घटना गुरुवारी रात्री साडेदहा ते पावणेअकराच्या घडली. याप्रकरणी चिराग राजपाल बिडला (वय २२, रा. गांधीनगर) याच्यासह दोन विधी संघर्षग्रस्त मुलांना शुक्रवारी पहाटे ताब्यात घेतले.
फिर्यादी मोहंमद आदिल मोहंमद आरेफ (वय २८, रा. चिश्तिया कॉलनी, एन-६, सिडको) व समीर खान सिकंदर खान हे दुचाकीने बिअर घेण्यासाठी औरंगपुऱ्या येथील पिया मार्केटमध्ये गुरुवारी रात्री साडे दहाच्या सुमारास आले होते. मार्केटमधील बिअर शॉपीसमोर दुचाकी उभी केली. त्यानंतर दोघेही पहिल्या मजल्यावरील बिअर शॉपीकडे गेले. मात्र, ती बंद असल्याने दोघेही खाली येऊन उभे राहिले. त्याचवेळी चिराग व त्याचे दोन अल्पवयीन साथीदार आपसात बोलत उभे होते. तेवढ्यात एकाने समीरला शिवीगाळ करून’ इकडे का आला,’ असे विचारले. त्यावर मोहंमदने ‘तू दारू पिलेला आहेस. इथून निघून जा,’ असे सांगितले. त्यावर त्याने मोहंमदच्या कानशिलात लगावली. म्हणून समीर खानने मध्यस्थीचा प्रयत्न केला. तेवढ्यातच एकाने समीरच्या गुप्तांगाजवळ चाकुने वार केल्याने समीर जमिनीवर कोसळला. घटनेनंतर मारेकरी पसार झाले, तर मोहंमदने तात्काळ शोएब नामक मित्राला फोन करून बोलावून घेतले. पुढे शोएब व मोहंमदने समीरला घाटीत नेले. मात्र, तोपर्यंत त्याचा मृत्यू झाला होता. या घटनेनंतर तिघांनी तेथून पळ काढला, अशी माहिती पोलिस सूत्रांनी दिली. याप्रकरणी सिटीचौक पोलिस ठाण्यात गुन्हा दाखल करण्यात आला आहे.
खुनाच्या घटनेची माहिती मिळताच सिटीचौक पोलिस ठाण्याचे निरीक्षक संभाजी पवार ताफ्यासह घटनास्थळी दाखल झाले. त्यानंतर त्यांनी पिया मार्केटमधील ‘सीसीटीव्ही’ फुटेजची तपासणी केली. तोपर्यंत पोलिस आयुक्त डॉ. निखिल गुप्ता, उपायुक्त नीकेश खाटमोडे, सहायक पोलिस आयुक्त हनुमंत भापकर, गुन्हे शाखेचे सहायक पोलिस आयुक्त सुरेश वानखेडे, पोलिस निरीक्षक अविनाश आघाव, आर्थिक गुन्हे शाखेचे निरीक्षक दादाराव शिनगारे यांच्यासह गुन्हे शाखा, बेगमपुरा, क्रांतीचौक पोलिस देखील दाखल झाले. ‘सीसीटीव्ही’ फुटेजची पाहणी केल्यानंतर पहाटे पोलिसांनी मारेकऱ्यांना घरातून उचलले.
आरोपीने गुप्तांगाजवळ चाकू वार केल्यामुळे समीर खानचा मृत्यू झाला. अशा पद्धतीने शहरात झालेला हा तिसरा खून आहे. मृत समीर खान रेकॉर्डवरील गुन्हेगार आहे. त्याच्याविरुद्ध यापूर्वी विनयभंग, हाणामारी, अपहरण, गांजा विक्री असे गंभीर स्वरुपाचे गुन्हे दाखल आहेत. शहरातून त्यास दोन वेळा तडीपार करण्यात आले होते. २०१९मध्ये त्याच्याविरुद्ध शेवटचा गुन्हा दाखल आहे. तर मारेकरी चिराग बिडला हा अल्पवयीन मुलाला दुचाकीवर बसवून कुत्र्याला फरफटत घेऊन जात होता. याप्रकरणी एका सामाजिक संस्थेच्या कार्यकर्त्याच्या तक्रारीवरुन ७ जून २०२० रोजी क्रांतीचौक पोलिस ठाण्यात बिडलाविरुद्ध गुन्हा दाखल करण्यात आला होता. त्याला याप्रकरणी अटक करण्यात आली होती, अशी माहिती पोलिसांनी दिली.
