वर्धा (जिल्हा प्रतिनिधी मनोज बाचले) – उपराजधानी नागपुरातील पाचपावली पोलीस स्टेशन हद्दीत एका पुतण्याने स्वतःच्याच काकाचा खून केला आहे. कौटुंबिक वादातून खुनाची घटना घडली आहे. अशोक मेश्राम (४०) असे मृत काकाचे नाव आहे. तर सारंग मेश्राम असे खून करणाऱ्या पुतण्याचे नाव आहे. या प्रकरणात पोलिसांनी आरोपीसह त्याच्या वडिलांनादेखील ताब्यात घेतले आहे.
शहरातील पाचपावली पोलीस स्टेशन हद्दीत पंचशील कॉलोनीमध्ये मेश्राम कुटुंबीय राहतात. रात्री कौटुंबिक कारणावरून काका पुतण्यामध्ये वादा झाला. त्यावेळी या घटनेचे रुपांतर खुनाच्या घटनेत होईल असे कुणालाही वाटले नाही. काका आणि पुतण्या एकमेकांचे शेजारी आहेत. अशोक मेश्रेमा हे ज्या ठिकाणी राहतात त्या ठिकाणी निर्माण कार्य सुरू आहे. रात्री घरातील सर्व सदस्य झोपी गेल्यानंतर आरोपी सारंग याने लाकडी दांड्याने झोपलेल्या काकांच्या डोक्यात वार केले. त्यामुळे त्यांचा जागीच मृत्यू झाला. त्यानंतर आरोपीने मृतदेहावर चादर पांघरली. त्यामुळे ते झोपलेले आहेत, असाच सगळ्यांना भास झाला. आज सकाळी ११ च्या सुमारास निर्माण स्थळी कामगार आल्यानंतरदेखील काका झोपून राहिल्याचे त्यांना जाणवले. कुणीही त्यांना उठविण्यचा प्रयत्न केला नाही. मात्र, बराच वेळा पासून त्यांची हालचाल होत नसल्याने त्यापैकी एकाने त्यांची चादर काढून त्यांना उठवण्याचा प्रयत्न केला. तेव्हा त्यांचा खून झाल्याचे उघड झाले आहे. या घटनेची माहिती समजताच पाचपावली पोलिसांनी घटनास्थळ गाठून तपासाला सुरुवात केली आहे.
पाचपावली परिसरात आरोपी सारंगचे कुटुंबीय राहतात. तर मृत अशोक मेश्राम हे शेजारी सुरू असलेल्या निर्माण कार्याच्या ठिकाणी झोपडी बांधून राहत होते. काका-पुतण्यामध्ये बाजारात गुरुवारी जोरदार वादावादी झाली होती. या संदर्भात पोलिसांनी माहिती मिळाल्यानंतर सारंगची चौकशी करण्यात आली. तेव्हा त्याने उडवा उडवीचे उत्तर देत असल्याने पोलिसांना त्याच्यावर संशय आला. त्यानंतर आरोपीला पोलीस ठाण्यात आणून सखोल चौकशी केली असता त्याने गुन्ह्याची कबुली दिली आहे
आरोपी सारंग मेश्राम याने खुनाचा पुरावा कुणालाही मिळू नये, यासाठी प्रयत्न केल्याचे उघड झाले आहे. मृतदेहावर चादर पांघरल्यामुळे त्यांना झोपेत कुणी आणि का मारले असावे, या संदर्भात माहिती नसल्याचा देखावा केला. आरोपीच्या कपड्यांवर रक्ताचे डाग पडले होते. ते कपडे देखील आरोपीने जाळले असल्याचे पुरावे पोलिसांना मिळाले असल्याचे सहायक पोलीस आयुक्त लोहित मतानी यांनी सांगितले.
