नवी मुंबई (प्रतिनिधी विरेंद्र म्हात्रे) – पेण येथून नवी मुंबईत मित्राला भेटण्यासाठी आलेल्या प्रतिक रवींद्र आहेर (२४) या तरुणावर अज्ञात त्रिकुटाने रिव्हॉल्वरने गोळीबार करून पलायन केल्याची घटना शनिवारी रात्री खारघरमध्ये घडली. या गोळीबारात प्रतिक जखमी झाला असून त्याच्यावर खासगी रुग्णालयात उपचार सुरू आहेत. हा प्रकार लुटमारीच्या उद्देशाने घडल्याचा प्राथमिक अंदाज पोलिसांकडून व्यक्त करण्यात येत आहे. त्यानुसार खारघर पोलिसांनी अज्ञात त्रिकुटावर गुन्हा दाखल करून त्यांचा शोध सुरू केला आहे.
या घटनेतील जखमी प्रतिक आहेर हा पेण शहरात राहण्यास असून त्याचा इस्टेट एजंटचा व्यवसाय आहे. शनिवारी दुपारी ३च्या सुमारास तो पेण येथून मोटारसायकलवरून नवी मुंबईत मित्राला भेटण्यासाठी आला होता. त्यानंतर रात्री १०च्या सुमारासवाशी येथून सायन-पनवेल महामार्गाने पनवेलच्या दिशेने जात होता. खारघर येथील कोपरी गाव बस थांब्यानजीक तो सिगारेट ओढण्यासाठी थांबला असता तीन अज्ञात व्यक्तींनी त्याच्याकडे मोबाइल, पैसे व मोटरसायकलच्या चावीची मागणी केली. मात्र, प्रतिकने नकार दिल्याने त्रिकुटापैकी एकाने त्याच्या डाव्या पायाच्या मांडीवर एक गोळी झाडली. त्यानंतर तिघांनी त्या ठिकाणावरून पलायन केले.
एका नागरिकाने याबाबत कळविल्यानंतर खारघर पोलिसांनी घटनास्थळी धाव घेऊन जखमी प्रतिकला खासगी रुग्णालयात दाखल केले आहे. लुटमारीच्या उद्देशाने हा गोळीबार करण्यात आला असल्याची शक्यता परिमंडळ-१चे पोलिस उपायुक्त सुरेश मेंगडे यांनी व्यक्त केली. तसेच आरोपींचा शोध घेण्यासाठी गुन्हे शाखा व पोलिस ठाण्याचे पथक रवाना करण्यात आल्याचेही त्यांनी सांगितले. या प्रकरणाचा पुढील तपास वरीष्ठ पोलिस निरीक्षक शत्रुघ्न माळी करीत आहेत.
