पुणे (प्रतिनिधी सुनील भोसले) – लॉकडाऊन काळात एका बिल्डरला खासदार अमोल कोल्हे बोलत असल्याची बतावणी करून फसविण्याचा प्रयत्न करणाऱ्याला खंडणी विरोधी पथकाने अटक केली आहे. त्याच्या विरोधात वानवडी पोलीस ठाण्यात गुन्हा दाखल करण्यात आला आहे. या आरोपीने पूर्वी देखील आमदार चंद्रकांत पाटील यांच्या नावाने फोन करून फसवणूक केल्याचे गुन्हे दाखल झाले आहेत.
विशाल अरुण शेंडगे (वय ३२, रा. टिळेकर नगर, कोंढवा) आणि सुरेश बंडू कांबळे (रा. गंज पेठ) अशी गुन्हा दाखल केलेल्यांची नावे आहेत. याबाबत गेरा बिल्डर्सचे व्यवस्थापकीय संचालक रोहितकुमार गेरा (रा. वानवडी) यांनी तक्रार दिली आहे. लॉकडाऊनच्या काळात गेरा बिल्डर्स यांना आरोपी शेंडगे याने फोन केला होता. खासदार अमोल कोल्हे बोलत असल्याचे सांगत नागरिकांना काही तरी मदत करा, निधी द्या, असे सांगून त्यांना त्याने फसविण्याचा प्रयत्न केला.
याबाबत गेरा यांनी चौकशी केली असता त्यांना खासदार कोल्हे यांनी फोन केला नसल्याची माहिती मिळाली. त्यानंतर त्यांनी पुणे पोलीस आयुक्त व पिंपरी चिंचवड पोलीस आयुक्त यांच्याकडे तक्रार अर्ज दिला होता. या तक्रार अर्जाची खंडणी विरोधी पथकाकडून चौकशी केली जात होती. त्यावेळी कोल्हे यांच्या नावाने फोन करणारी व्यक्ती शेंडगे असल्याचे समोर आले.
पोलीस उपायुक्त बच्चन सिंग यांच्या मार्गदर्शनाखाली खंडणी विरोधी पथकाचे निरीक्षक बालाजी पांढरे यांच्या पथकाने उपलब्ध माहितीच्या आधारे शेंडगे याला पकडले. त्याला मदत करणारा आरोपी कांबळे याचा शोध सुरू आहे. शेंडगे याने आमदार चंद्रकांत पाटील व त्यांचा पीए असल्याचे सांगून नागरिकांना फोन करून पैसे उकळले आहेत. याप्रकरणी आतापर्यंत त्याच्यावर सात गुन्हे दाखल आहेत.
