औरंगाबाद (जिल्हा प्रतिनिधी दत्तात्रय मोटे) – लग्नाचे आमीष दाखवून महिलेवर अत्याचार केल्याप्रकरणी उद्योजकाविरुद्ध सातारा पोलिस ठाण्यात गुन्हा दाखल करण्यात आला आहे.
अतिक सिद्दीक मोतीवाला असे या उद्योजकाचे नाव आहे. पीडित महिलेने दिलेल्या तक्रारीत म्हटले आहे की, ही महिला २०१४ ते २०१६ या काळात सतीश मोटर्समध्ये कामाला होती. त्यादरम्यान, तिची ओळख अतिक मोतीवाला यांच्याशी झाली होती. या ओळखीतून त्यांनी ५ एप्रिल २०१५ रोजी तिच्यावर अत्याचार केला. पीडिता पोलिसांकडे जात असताना, त्यांनी तिला लग्नाचे आमीष दाखवले. त्यानंतरही त्यांनी तिच्यावर अनेक वेळा अत्याचार केला. तसेच, तिच्याकडून पैसे घेतले आणि परत दिले नाहीत. त्यांचे लग्न झाले असून, त्यांना मुले असल्याचे समजल्यानंतर ही महिला २०१८मध्ये सुरतला परतली. त्यानंतर, फोटो आणि व्हिडिओ व्हायरल करण्याची धमकी देत, त्यांनी तिला परत बोलावले.
पुढे २९ नोव्हेंबर २०२० रोजीही तिच्यावर अत्याचार केला. या प्रकारामुळे पीडिता घाबरलेली होती. त्यामुळे तिने राज्य महिला आयोगाकडे तक्रार दिली होती. या तक्रारीवरून सातारा पोलिस ठाण्यात शनिवारी (३ एप्रिल) गुन्हा दाखल करण्यात आला. या प्रकरणाचा पुढील तपास उपनिरीक्षक अनिता फसाटे या करत आहेत.
