नागपूर (कार्यालय प्रतिनिधी) – बिल व मृतदेह ताब्यात घेण्याच्या वादातूनच कामठी मार्गावरील होप हॉस्पिटलमध्ये तोडफोड, जाळपोळ करून डॉ. बी. के. मुरली (वय ५२ रा.सदर) यांना मारहाण करण्यात आल्याचे समोर आले आहे. याप्रकरणी पाचपावली पोलिसांनी गैरकायद्याची मंडळी जमवून मारहाण केल्याचा गुन्हा दाखल करून नऊ जणांना अटक केली.
कृष्णा ऊर्फ गोलू रामदास कडव (वय २९ रा.धम्मदीपनगर), पंकज भीमराव खांडेकर (वय २९ रा.धम्मानंदनगर), शुभम रामजी शेंडे (वय २७ रा. जुनी वस्ती,पिवळी नदी), सचिन वियज मानवटकर (वय २७ रा. मांजरी), अभिलाश रामजी शेंडे(वय २७ रा. जुनी वस्ती), रुपचंद हरीदास लोणारे (वय २४ रा.सन्माननगर) , दीपक बुद्धूलाल लखेरा(वय २८ रा. भंते आनंद कौशल्यानगर), ओमप्रकाश शिवकुमार साहू (वय ४५ रा. कपिलनगर) व प्रद्युम्न दीपक रामटेके (वय २३ रा. सन्मानगर),अशी अटकेतील आरोपींची नावे आहेत. राकेश पाली हा फरार आहे.
३० मार्चला राकेश याची पत्नी सुनीता यांची प्रकृती खालावली. राकेश याने त्यांना होप हॉस्पिटलमध्ये दाखल केले. चाचणीदरम्यान सुनीता या करोनाबाधित असल्याचे निष्पन्न झाले. त्यांच्यावर उपचार सुरू असताना शनिवारी सकाळी १०.३० वाजताच्या सुमारास सुनीता यांचा मृत्यू झाला. करोनाबाधित असल्याने नियमानुसार डॉक्टर बी. के. मुरली यांनी महापालिकेच्या आरोग्य विभागाला माहिती दिली. दरम्यान, सुरेश यांना उर्वरित ८७ हजार रुपये जमा करण्यास हॉस्पिटल व्यवस्थापनाने सांगितले. सुरेश यांनी डॉक्टरांच्या निष्काळजीपणाने पत्नीचा मृत्यू झाल्याचा आरोप करून नातेवाइकांसह हॉस्पिटलमध्ये गोंधळ घालायला सुरुवात केली.
पत्नीचा मृतदेह ताब्यात देण्यासाठी डॉ. मुरली यांच्यासोबत वाद घातला. त्यानंतर त्यांनी डॉ. मुरली यांना धक्काबुक्की केली. अन्य एक कर्मचारी मदतीसाठी धावला. त्यालाही पाली यांच्या नातेवाइकांनी मारहाण केली. हॉस्पिटलमध्ये तोडफोड करून आग लावली. आगीत १० लाखांचे साहित्य जळून राख झाले. या घटनेने तणाव निर्माण झाला होता. पाचपावलीचे वरिष्ठ पोलिस निरीक्षक किशोर नगराळे यांच्यासह पोलिसांचा ताफा तेथे पोहोचला. पोलिसांनी नऊ जणांना अटक केली. त्यांना न्यायालयात हजर केले.
