अमरावती (क्राइम रिपोर्टर आसिफ कुरैशी) – अमरावती शहर दहशतवाद विरोधी पथकाने आज नांदगाव पेठ पोलीस स्टेशनच्या हद्दीत केलेल्या कारवाईत ६ पेट्यांमध्ये १ हजार २०० जिलेटिन कांड्या आढळून आल्या. फोर्ड इकोस्पोर्ट कारमधून जिलेटिनची वाहतूक होत असल्याच्या गोपनीय माहितीच्या आधारे करण्यात आलेल्या कारवाईत दोन आरोपींसह १० लाख ५९ हजार ६० रुपये किमतीचा मुद्देमाल जप्त करण्यात दहशतवादी विरोधी पथाला यश आले.
अमरावती शहर दहशतवाद विरोधी कक्ष येथील पोलीस शहरात गस्त घालत असताना मिळालेल्या विश्वासनीय माहितीच्या आधारे सापळा रचण्यात आला. नांदगाव पेठ पोलीस स्टेशन हद्दीतील वडगाव माहुरे रोडवर सदर कारवाई करण्यात आली. एक फोर्ड इकोस्पोर्ट कारमध्ये दोन इसम संशयास्पद स्थितीत आढळून आले. या गाडीची तपासणी केली असता त्यात ६ पेट्या आढळून आल्या. त्यात १ हजार २०० नग जिलेटिन कांड्या होत्या. त्यासह व कार आणि २ मोबाइल असा एकूण १० लाख ५९ हजार ६० रुपयांचा मुद्देमाल जप्त करण्यात आला असून आरोपी कानसिंह गणपतसिंह राणावत (वय ४४ रा. संगमेश्वर नगर, नांदगाव पेठे) व सूरज भरतसिंह बैस (वय ३१ वर्ष रा. गजानन नगर नांदगाव पेठ) यांना अटक करण्यात आली आहे.
आरोपींविरोधात नांदगाव पेठ पोलीस स्टेशनमध्ये गुन्हा दाखल करण्यात आला आहे. ही कारवाई पोलीस आयुक्त डॉ. आरती सिंह यांच्या मार्गदर्शनाखाली पोलीस निरीक्षक निलीमा आजर यांच्या नेतृत्वात दहशतवाद विरोधी कक्षाचे सहायक पोलीस निरीक्षक पंकजकुमार चक्रे, हेड कॉन्स्टेबल दीपक श्रीवास, जमील अहमद, अमर बघेल, मनोज कोकळे, अभिराज इंदुरकर यांनी केली.
