औरंगाबाद (जिल्हा प्रतिनिधी दत्तात्रय मोटे) – अट्टल दुचाकी चोरट्याने विविध ठिकाणाहून चोरी केलेल्या १ लाख ३५ हजार रुपये किमतीच्या पाच दुचाकी पोलिसांनी शुक्रवारी जप्त केल्या. या चोरट्याने औरंगाबाद आणि जळगाव जिल्ह्यातून या दुचाकींची चोरी केली होती.
शेखर उर्फ अण्णा दांडगे (२८ रा. रेणुकाई पिंपळगा, ता. भोकरदन, जि.जालना) असे आरोपीचे नाव आहे. या विषयी अधिक माहिती अशी, की वाळूज महानगरातील राजेश सत्यभान कांबळे यांची मोपेड (एमएच २०, डीएस ०७२९) व लक्ष्मण मनोहर यांची दुचाकी (एमएच २०, सीझेड ३९८०) दोन वर्षांपूर्वी परिसरातून चोरीला गेली होती.
या प्रकरणी वाळूज एमआयडीसी पोलिस ठाण्यात गुन्हा दाखल करण्यात आला होता. दरम्यान, सिल्लोड तालुक्यातील पारध पोलिसांनी काही दिवसांपूर्वी शेखर दांडगेला अटक केली होती. त्यावेळी त्याच्या ताब्यातून लक्ष्मण मनोहर यांची दुचाकी जप्त करण्यात आली होती. ही दुचाकी वाळूज महानगरातील असल्याने न्यायालयात हस्तांतरण वारंट घेऊन दांडगे याला सात एप्रिल रोजी पोलिसांनी ताब्यात घेतले होते.
त्या वेळी त्याची चौकशी केली असता त्याने औरंगाबाद व जळगाव जिल्ह्यातून पाच दुचाकी चोरल्याची कबुली दिली. आरोपीने विविध ठिकाणावरून चोरी केलेल्या दुचाकी त्याच्या मुळगावी नेऊन लपवून ठेवत होता. तसेच तेथे ग्राहक शोधून, या दुचाकींचे हप्ते थकल्याने बँकेने जप्त केल्या असल्याची थाप मारून विक्री करत होता. पोलिसांनी आरोपी दांडगे याने विक्री केलेल्या १ लाख ३५ हजार रुपये किंमतीच्या पाच दुचाकी खरेदीदारांकडून जप्त केल्या आहेत.
वाळूज पोलिस आयुक्त डॉ.निखिल गुप्ता यांच्या मार्गदर्शनाखाली एमआयडीसी पोलिस ठाण्याचे निरीक्षक मधुकर सावंत, सहायक निरीक्षक गौतम वावळे, सहाय्यक फौजदार कय्युम पठाण, प्रकाश गायकवाड, सुधीर सोनवणे, नवाब शेख, धीरज काबलीये, विनोद परदेशी, मनमोहन कोलिमी, रेवनाथ गवळे, दीपक मतलबे, विक्रम वाघ यांच्या पथकाने ही कारवाई केली.
