नागपूर (कार्यालय प्रतिनिधी) – महिला डॉक्टरवर अत्याचाराची चित्रफित काढून ब्लॅकमेल करणाऱ्या सहाय्यक आयकर आयुक्ताविरुद्ध खापरखेडा पोलिसांनी अत्याचारासह विविध कलमान्वये गुन्हा दाखल केला आहे. सुथांदिरा पुन्नोस्वामी बालन (वय ३५ रा. सेल्लूर, पॉण्डेचेरी), असे गुन्हा दाखल करण्यात आलेल्या आयकर आयुक्ताचे नाव आहे. ते सध्या बंगळुरू येथे आयकर विभागात कार्यरत आहेत.
२५ वर्षीय डॉ. रिया (बदललेले नाव) उत्तर नागपुरात राहते. २०१९मध्ये सुथांदिरा हे मानकापूरमधील राष्ट्रीय प्रत्यक्ष कर अकादमीमध्ये (एनएडीटी)प्रशिक्षण घेत होते. याच कालावधीत रिया ही मानकापूरमधील एका हॉस्पिटलमध्ये निवासी वैद्यकीय अधिकारी होती. प्रकृती खालावल्याने सुथांदिरा हे हॉस्पिटलमध्ये गेले. यादरम्यान त्यांची रियासोबत ओळख झाली. रियानेही केंद्रीय लोकसेवा आयोगाच्या परीक्षेसाठी मार्गदर्शन करण्याची विनंती सुथांदिरा यांना केली. त्यांनी रियाचा मोबाइल क्रमांक घेतला. त्यानंतर दोघांमध्ये चॅटिंग सुरू झाली. विवाहित असतानाही अविवाहित असल्याचे सुथांदिरा यांनी रियाला सांगितले. तिला दहेगाव रंगारीतील सनराइज हॉटेल अॅण्ड रेस्टॉरेंटमध्ये बोलाविले.
लग्नाचे आमिष दाखवून तिच्यावर अत्याचार केला. तिचे अश्लील छायचित्र व चित्रफित काढली. दरम्यान, ती गर्भवती राहिली. सुथांदिराने तिला गर्भपात करण्यास भाग पाडले. दरम्यान, सुथांदिरा विदेशात गेले. त्यानंतर त्यांनी तिच्याशी संपर्क साधणे बंद केले. मार्च महिन्यात रियाने एनएडीटीची बेवसाइट तपासली. त्यात सुथांदिरा हे विवाहित असल्याचे तिला कळले. तिने सीताबर्डी पोलिसांत तक्रार दिली. सीताबर्डी पोलिसांनी चौकशी केली. सुथांदिरा यांनाही बोलाविले. यावेळी रियाने मानसिकस्थिती खालावल्याचे कारण सांगून तक्रार दिली नाही. त्यानंतर सुथांदिरा हे तिला चित्रफित व्हायरल करण्याची धमकी देऊ लागले.
अखेरीस रियाने कोराडी पोलिसांत तक्रार दिली. कोराडी पोलिसांनी तिला खापरखेडा पोलिसांकडे पाठविले. रियाने खापरखेडा पोलिसांत तक्रार दिली. पोलिसांनी अत्याचारासह विविध कलमान्वये गुन्हा दाखल केला. खापरखेडा पोलिस स्टेशनचे वरिष्ठ पोलिस निरीक्षक पुंडलिक भटकर या प्रकरणाचा तपास करीत आहेत.
