भंडारा – मोहाडी शहरातील इंदिरा वॉर्डात एका लग्नघरातून तब्बल साडेपाच लाख रुपयांचे दागिने व रोख रक्कम चोरून नेल्याची घटना २७ मे रोजी मध्यरात्रीच्या सुमारास घडली. याप्रकरणी मोहाडी पोलिसांनी अज्ञात चोरट्यांविरुद्ध गुन्हा नोंदविला आहे.
इंदिरा वॉर्डातील हेमंत वासुदेव सव्वालाखे यांचा गोंदिया येथील भाच्याचे लग्न त्यांच्या घरून २८ मे रोजी ठरविण्यात आले. त्यामुळे भाचा, बहीण व अन्य पाहुणे २७ मे रोजी मोहाडीला आले. या पाहुण्यांनी आपल्या सामानांच्या बॅगा एका खोलीत ठेवल्या. सायंकाळी मंडप पूजनाचा कार्यक्रम आटोपल्यानंतर सर्व पाहुणे झोपी गेले. दुसऱ्या दिवशी सकाळी १० वाजताच्या सुमारास भाचा योगेश मसरके याचे लग्न असल्याने काही पाहुणे लग्न लावण्याकरिता ईर्री (जि. गोंदिया) येथे निघून गेले.
त्यानंतर महिला वरच्या माळ्यावरील खोलीत गेल्या असता त्यांना खोलीतील बॅगा अस्ताव्यस्त फेकलेल्या दिसल्या. त्यांनी बॅगची पाहणी केली असता दागिने चोरीला गेल्याचे समजले. याप्रकरणी हेमंत वासुदेव सव्वालाखे यांच्या तक्रारीवरून मोहाडी पोलिसांनी अज्ञात चोरांविरुद्ध गुन्हा नोंदविला आहे. अधिक तपास पोलिस निरीक्षक देशपांडे करीत आहेत.
