पुणे (प्रतिनिधी सुनिल भोसले) – कोरोनाचा अहवाल पॉझिटिव्ह आल्यानंतर कोविड सेंटरमध्ये उपचार घेणाऱ्या महिलेच्या अंगावरील सोन्याच्या दागिन्यांवर चोरट्यानं डल्ला मारला आहे. पुण्यातील एका कोविड सेंटरमध्ये घडलेल्या घटनेनं खळबळ उडाली आहे. दरम्यान, या आधीही अशीच घटना घडली होती. त्यामुळं कोविड सेंटरमधील सुरक्षा व्यवस्थेचा प्रश्न निर्माण होत आहे.
कोथरूड येथील देवयानी हॉस्पिटलमध्ये कोरोना रुग्ण असलेल्या महिलेला उपचारासाठी दाखल केल्यानंतर हातामधील एक लाख ३५ हजार रूपये किंमतीच्या बांगड्या चोरून नेल्याचा धक्कादायक प्रकार समोर आला आहे. याप्रकरणी अलंकार पोलिस ठाण्यात चोरीचा गुन्हा दाखल करण्यात आला आहे.
याबाबत मोशी येथील ३८ वर्षीय व्यक्तीने तक्रार दिली आहे. त्यानुसार अज्ञात व्यक्तीच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार हे इंजिनिअर असून ते कुटुंबासह मोशी येथे राहण्यास आहेत. त्यांच्या आईला कोरोनाची लागण झाल्यामुळे उपचारासाठी त्यांना २४ एप्रिल रोजी देहुगाव येथील हॉस्पिटलमध्ये ऍडमीट केले होते. पण, त्या ठिकाणी आधुनिक सुविधा नसल्यामुळे तक्रारदार यांच्या आईला १३ मे रोजी कोथरूड येथील देवयानी हॉस्पिटलमध्ये ॲडमीट केले होते.
या हॉस्पिटलमध्ये आयसीयू विभागात तक्रारदार यांच्या आईला दाखल केले होते. त्यावेळी आयसीयूमधील नर्सनं तक्रारदार यांना त्यांच्या आईची दोन कर्णफुले, चार सोन्याच्या बांगड्या आणून दिल्या. पण, तक्रारदार यांची आई नेहमी हातामध्ये सहा बांगड्या घालत असल्याचे त्यांना माहिती होते. त्यामुळे त्यांनी नर्स व डॉक्टरांना विचारणा केली. पण त्यांना समाधानकारक माहिती मिळाली नाही. तक्रारदार यांच्या आईची तब्बेत खूपच खराब होती. त्यामुळे त्यांनी देखील याप्रकरणाकडे जास्त लक्ष दिले नाही. २२ मे रोजी तक्रारदार यांच्या आईचे कोरोनामुळे निधन झाले. त्यानंतर तक्रारदार यांनी घरी बांगड्या पाहिल्या. तसेच, हॉस्पिटलमध्ये देखील चौकशी केली. पण, त्या सापडल्या नाहीत. त्यावेळी त्यांना हॉस्पिटलमध्ये अॅडमीट केल्यानंतर बांगड्या चोरल्याची तक्रार पोलिसांकडे दिली आहे. याप्रकरणी अलंकार पोलिस अधिक तपास करत आहेत.
