नागपूर (उपसंपादक उमेश अबलनकर) : पोलिसांत तक्रार दिल्याच्या रागातून युवकाने कुऱ्हाडीने वार करून ४५ वर्षीय इसमाची निर्घृण हत्या केली. ही थरारक घटना पिपळा फाटा परिसरातील न्यू नेहरुनगर येथे शनिवारी रात्री ९.३० वाजताच्या सुमारास घडली. देवदर्शन ऊर्फ बाळू मेश्राम (वय ४५, रा. न्यू नेहरूनगर, पिपळा फाटा), असे मृतकाचे तर, सूरज विलास बागडे (वय २५) असे मारेकऱ्याचे नाव आहे. सूरज हा फरार असून, हुडकेश्वर पोलिस त्याचा शोध घेत आहेत.
पोलिसांकडून मिळालेल्या माहितीनुसार, बाळू मेश्राम यांचा उमरेड मार्गावरील शंकरपूर येथे कुक्कुटपालनचा व्यवसाय आहे. सूरज व मेश्राम कुटुंबीय शेजारी राहतात. सूरज याला दारूचे व्यसन आहे. काही दिवसांपूर्वी बाळू यांनी सूरजच्या घरासमोर टिन ठेवले. त्यामुळे सूरज संतापला. त्याने बाळू यांच्यासोबत वाद घातला. सूरजने त्यांना शिवीगाळ करून ठार मारण्याची धमकी दिली. सूरज हा आपल्याला ठार मारेल, अशी भीती बाळू यांना होती. त्यांनी हुडकेश्वर पोलिसांत सूरजविरुद्ध तक्रार दिली.
बाळू यांनी पोलिसांत तक्रार दिल्याने सूरज आणखी संतापला. शनिवारी दुपारी ४ वाजताच्या सुमारास सूरज हा दारू पिऊन आला. त्याने बाळू यांच्या पत्नी सुलोचन व मुलाला शिवीगाळ केली. रात्री बाळू घरी आले. सुलोचन यांनी घडलेला प्रकार बाळू यांना सांगितला. बाळू हे सूरजला समजविण्यासाठी त्याच्या घरी गेले. बाळू यांना बघताच सूरजने शिवीगाळ करायला सुरुवात केली. कुऱ्हाडीने त्यांच्यावर सपासप वार केले. बाळू रक्ताच्या थारोळ्यात खाली पडले. सूरज पसार झाला. शेजाऱ्यांनी बाळू यांना मेडिकल कॉलेज हॉस्पिटलमध्ये दाखल केले. उपचारादरम्यान रविवारी पहाटे बाळू यांचा मृत्यू झाला. याप्रकरणी हुडकेश्वर पोलिसांनी खुनाचा गुन्हा दाखल करून सूरजचा शोध सुरू केला आहे.
