नाशिक (विशेष प्रतिनिधी) : दिवाळीची संधी साधत सटाणा तालुक्यातील ठेंगोडा येथे सोने-चांदीला पॉलिश करण्याचा बहाणा करून प्रदीप शेवाळे यांच्या कुटुंबाचे तीन तोळ्यांचे दागिने लंपास केल्याची घटना घडली आहे. चोरांनी दोन तोळ्याची सोन्याची माळ व एक तोळ्याचे कानातील दागिने घेऊन मोटरसायकलवरून पसार झाले.
पॉलिश पावडर विक्रेता असल्याचे कार्ड दाखवत ललिता शेवाळे यांना चांदी व पितळाच्या भांड्याला पॉलिश करून देतो, असे सांगत दोन अनोळखी व्यक्ती आले. सुरुवातीला चांदीच्या मूर्तीला पॉलिश करून दिली. त्यानंतर बोलण्यात अडकवून पाणी पिण्याच्या बहाण्याने घरात प्रवेश केला. शेवाळे यांना बोलण्यात गुंतवत गळ्यातील दोन तोळ्याची सोन्याची माळ व एक तोळ्याची कानातील दागिने पॉलिश करण्यासाठी हातात घेत घेतले. यावेळी चोरट्यांनी शेवाळे यांच्या हातात पावडर दिली. या पावडरमुळे त्यांना गुंगी आली. नंतर लगेचच चोरांनी दोन तोळ्याची सोन्याची माळ व एक तोळ्याचे कानातील दागिने घेऊन मोटरसायकलवरून पसार झाले. याप्रकरणी सटाणा पोलीस ठाण्यात प्रदीप व ललिता शेवाळे यांनी तक्रार दाखल केली आहे.
प्रदीप शेवाळे यांच्या घरात सहा महिन्यांत दुसऱ्यांदा चोरीची घटना घडली आहे. यापूर्वी अज्ञात चोरट्यांनी शेवाळे यांच्या घरासमोर लावलेली सायकल चोरून नेली होती. या घटनेत शेवाळे यांचा मोठा ऐवज गेला असून चोरटे सीसीटीव्हीत कैद झालेले आहेत. चोरटे परिसरातील इतर नागरिकांची देखील फसवणूक करू शकतात म्हणून नागरिकांनी सावध राहावे, असे शेवाळे यांनी सांगितले आहे.
