आगरतळा – त्रिपुरातील एका तरुणीला पूर्वाश्रमीच्या बॉयफ्रेंडवर अॅसिड फेकल्याप्रकरणी अटक करण्यात आली आहे. यात तो गंभीर जखमी झाला आहे. त्याच्यावर रुग्णालयात उपचार सुरू आहेत. या तरुणीला कोर्टात हजर केले असता, तिला १४ दिवसांची न्यायालयीन कोठी सुनावली आहे.
पोलिसांनी दिलेल्या माहितीनुसार, पूर्वाश्रमीच्या प्रियकरावर अॅसिड फेकल्याचा आरोप त्रिपुरातील खोवाई जिल्ह्यातील या तरुणीवर आहे. बेलछेडा गावात राहणाऱ्या या तरुणीने १९ ऑक्टोबर रोजी आपल्या पूर्वाश्रमीच्या प्रियकरावर अॅसिड फेकले. त्या तरुणाने तिच्यासोबत बोलण्यास नकार दिला होता. यावरून राग अनावर झाल्याने तिने त्या तरुणावर अॅसिड हल्ला केला.
या अॅसिड हल्ल्यात तरुण गंभीररित्या होरपळला आहे. त्याला रुग्णालयात उपचारासाठी दाखल करण्यात आले आहे. तरुणाच्या कुटुंबीयांनी या तरुणीविरोधात पोलीस ठाण्यात तक्रार दाखल केली आहे. त्यानंतर पोलिसांनी तिला अटक करून बुधवारी न्यायालयात हजर केले. तरुणीला १४ दिवसांची न्यायालयीन कोठडी सुनावली आहे.
अॅसिड हल्ला करणारी तरुणी आणि पीडित तरूण हे खोवाई जिल्ह्यातील एकाच गावात राहतात. ते काही महिन्यांपासून परराज्यात राहत होते. सप्टेंबरमध्ये करोना काळात ते दोघेही आपापल्या घरी परतले होते. मात्र, पीडित तरूण तिच्यासोबत बोलण्यास टाळाटाळ करत होता. इतकेच नाही तर त्याने तिचा संपर्क क्रमांकही ब्लॉक केला होता. त्यामुळे तरूणी संतापली होती. अखेर तरुणीने त्याला भेटण्यासाठी बोलावले. तो तयारही झाला. तिने सोबत अॅसिड आणले होते. या दोघांमध्ये तिथेही वाद झाला. तिने सोबत आणलेले अॅसिड तरुणावर फेकले. त्यानंतर ती तेथून पळून गेली.
