नवी दिल्ली – दिल्लीच्या नंदनगरी भागातील सुंदर नगरमध्ये भारतीय जनता पक्षाचे नेते आणि आरटीआय कार्यकर्ते जुल्फिकार कुरैशी यांची गोळ्या घालून हत्या करण्यात आली आहे.
सोमवारी, सकाळी ७.०० वाजल्याच्या सुमारास जुल्फिकार हे सकाळी नमाज पढण्यासाठी जात असताना त्यांच्यावर अज्ञातांकडून गोळीबार करण्यात आला. तसंच हल्लेखोरांनी जुल्फिकार कुरैशी यांच्या मुलावर चाकूनं हल्ला केला. मशिदीच्या बाहेरच ही घटना घडली.हल्लेखोर अगोदरपासूनच घटनास्थळावर घात लावून बसल्याचं प्रत्यक्षदर्शींनी म्हटलंय. कुरैशी इथं दाखल होताच हल्लेखोरांनी त्यांच्यावर हल्ला केला.
हल्ल्यात जुल्फिकार यांचा जागीच मृत्यू झाला तर त्यांच्या मुलाची प्रकृती गंभीर आहे. त्याच्यावर स्वामी दयानंतर रुग्णालयात उपचार सुरू आहेत. डॉक्टरांकडून त्याची प्रकृती गंभीर असल्याचं समजतंय. जुल्फीकार भाजपच्या अल्पसंख्यांक मोर्चा आणि संघाशी निगडीत इंद्रेश कुमार यांच्या कुटुंबाशी निगडीत आहेत.
जुल्फीकार यांनी काही दिवसांपूर्वी एका बिगर सरकारी संस्थेची स्थापना केली होती. तसंच माफिया आणि मादक पदार्थांची विक्री करणाऱ्यांविरोधात त्यांनी मोहीम उघडली होती. उल्लेखनीय म्हणजे जुल्फीकार यांच्यावर याआधीही अनेकदा हल्ले घडवून आणण्यात आले होते. त्यामुळे हल्लेखोरांचा त्यांच्या हत्येमागे काय हेतू होता, याबद्दल पोलीस अधिक तपास करत आहेत.
दिल्ली पोलिसांकडून भाजप नेते जुल्फिकार यांचा मृतदेह ताब्यात घेण्यात आलाय. मृतदेह पोस्टमॉर्टेमसाठी पाठवण्यात आला असून हत्येबाबत तपास आणि चौकशी सुरू असल्याचं पोलिसांनी सांगितलंय.
