लुधियाना – २५ वर्षीय नवविवाहित तरूणी आणि तिच्या तीन साथीदारांविरोधात पंजाबमधील लुधियाना पोलिसांनी गुन्हा नोंदवला आहे. सासरच्या घरातून १८ हजारांची रोकड आणि दागिने लंपास केल्याचा आरोप त्यांच्यावर आहे. १६ दिवसांपूर्वीच तिचे लग्न झाले होते.
लुधियानातील सिधवन कालन येथे हा प्रकार घडला. मिळालेल्या माहितीनुसार, कमलप्रीत कौर, तेजिंदर पाल अशी दोघा आरोपींची नावे आहेत. इतर दोघा आरोपींची नावे समजू शकलेली नाहीत, अशी माहिती पोलिसांनी दिली. कमलप्रीत ही दोधर मोगा येथील रहिवासी आहे, तर तेजिंदर हा घोलिया खुर्द येथील रहिवासी आहे. या प्रकरणी कमलप्रीतचे सासरे कुलवंत सिंग यांनी पोलिसांत तक्रार दाखल केली आहे.
कुलवंत सिंग यांच्या म्हणण्यानुसार, गुरुप्रीत सिंग याचे कमलप्रीतसोबत १ नोव्हेंबरला लग्न झाले. गुरुप्रीत हा १६ नोव्हेंबर रोजी कामावर निघून गेला. त्यानंतर काही वेळाने कमलप्रीत घराबाहेर पडली. बस स्टॉपवर माहेरील नातेवाईकाला आणायला जाते असे सांगून ती घरातून निघून गेली. मात्र, बराच वेळ झाला तरी ती परतली नाही. कुटुंबीयांनी तिचा सर्वत्र शोध घेतला. त्यावेळी गावातील काही नागरिकांनी कमलप्रीत ही तिघांसोबत कारमधून निघून गेल्याचे सांगितले. घरी येऊन पाहिले असता, घरातील रोकड आणि दागिने गायब होते.
कुलवंत सिंग यांनी तक्रार केल्यानंतर पोलिसांनी गुन्हा नोंदवला आहे. आरोपींचा शोध घेण्यात येत आहे. त्यांना लवकरच अटक करण्यात येईल, अशी माहिती पोलिसांनी दिली.
