औरंगाबाद – जादा प्रवासी बसवून नेणाऱ्या रिक्षाचालकाला पोलिसांनी थांबवून रिक्षा रस्त्याच्या बाजूला नेत असताना चालकाने सोबत बसलेल्या पोलिस कर्मचाऱ्याला धक्का देऊन पाडण्याचा प्रयत्न केला व काही अंतर पोलिस कर्मचाऱ्याला चक्क फरफटत नेले. त्यात पोलिस कर्मचारी जखमी झाला. ही घटना जालना रोडवरील उच्च न्यायालय चौकात गुरुवारी (२६ नोव्हेंबर) सकाळी ११च्या सुमारास घडली. याप्रकरणी रिक्षाचालक फारूक शहा निसार शहा (रा. हिनानगर, चिलकलठाणा) याला पोलिसांनी अटक केली आहे.
याप्रकरणी पोलिसांनी दिलेल्या माहितीनुसार, वाहतूक पोलिस अंमलदार हसिबोद्दीन गयासोद्दीन शेख हे उच्च न्यायालय चौकात गुरुवारी त्यांचे सहकारी गानोराव घुगे यांच्यासोबत ड्यूटी करीत होते. वसंतराव नाईक चौकाकडून आलेला रिक्षा (एमएच २० ईके ०८०४) ही सिग्नलवर थांबला. रिक्षात समोरच्या सीटवर दोन आणि मागील सीटवर चार प्रवासी बसलेले होते. पोलिस अंमलदार शेख यांनी चालकाकडून रिक्षातील प्रवासी उतरवून घेतले. यानंतर संबंधितकारवाई करण्यासाठी रिक्षा चालकासोबत पुढच्या सीटवर बसून रिक्षा बाजुला घेण्यासाठी सांगितले.
चालकाने रिक्षा बाजुला नेण्यासाठी सिग्नलहून रिक्षा आणली. वेगात रिक्षा चालवून चालकासोबत बसलेल्या वाहतूक पोलिसाला धक्का देऊन पाडण्याचा प्रयत्न केला. गयासोद्दीन यांनी प्रसंगवधान राखत चालकाच्या सीटजवळील लोखंडी पाइप पकडला. रिक्षा चालकाने वेग आणखी वाढविला. त्यामुळे ते रस्त्यावर पाडले. त्यावेळी पायावरून रिक्षाचे चाक गेल्यामुळे गयासोद्दीन हे जखमी झाले. गयासोद्दीन यांच्यासोबत काम करणाऱ्या वाहतूक अमंलदार गोनाराव घुगे यांनी रिक्षाचालक फारूख शहा याला अटक केली. या चालकाविरोधात पुंडलिकनगर पोलिस ठाण्यात गुन्हा दाखल करण्यात आला आहे.
