अहमदनगर (प्रतिनिधी) – नगरच्या तारकपूर परिसरात तीन दिवसांपूर्वी एका १५ वर्षांच्या अल्पवयीन मुलीने आत्महत्या केली होती. या आत्महत्या प्रकरणाला वेगळे वळण लागले असून, मुलीवर धर्मांतरासाठी जबरदस्ती केल्यानेच तिने आत्महत्या केल्याचा गंभीर आरोप आईने केला आहे. तशी तक्रार तोफखाना पोलीस ठाण्यात दिली आहे. त्यावरून सोहेल शेख (वय १९, रा. पुणे) या तरुणाविरोधात काल, शुक्रवारी रात्री उशिरा गुन्हा दाखल करण्यात आला असून, त्याला अटक केली आहे.
आमची मुलगी अल्पवयीन होती. तिला फूस लावून प्रेमाच्या जाळ्यात ओढले. तिच्यावर लग्नासाठी तसेच धर्मांतरासाठी जबरदस्ती केली. सोहेल शेख याने तिला वारंवार फोन करून त्रास दिला व आत्महत्या करण्यास प्रवृत्त केले, असे पीडितेच्या आईने तक्रारीत म्हटले आहे.
तारकपूर परिसरात २५ नोव्हेंबरला एका पंधरा वर्षाच्या मुलीने आत्महत्या केली. या प्रकरणी मुलीच्या आईने दिलेल्या तक्रारीवरून तोफखाना पोलीस ठाण्यात गुन्हा दाखल करण्यात आला आहे. मुलीच्या आईच्या तक्रारीनुसार, ‘मुलगी एका वर्षापूर्वी पुणे येथे माझ्या मावस भावाकडे उन्हाळ्याच्या सुट्टीसाठी गेली होती. त्यावेळी माझ्या मावस भावाच्या विवाहित मुलीला भेटण्यासाठी तिच्या घरी गेली होती. तेव्हा तिथे तिची ओळख सोहेल शेख याच्याशी झाली. त्याने मुलीला फूस लावून प्रेमाच्या जाळ्यात ओढले. तसेच माझ्या पतीला फोन करून, तुमच्या मुलीचे लग्न जर माझ्याशी लावून दिले नाही, तर अख्ख नगर पेटवून देईल, अशी धमकी दिली होती.’
लॉकडाऊन सुरू झाल्यानंतर देखील त्याने फोन करून माझ्या पतीला धमकी दिली होती. तसेच मुलीने सोहेल याच्याविरोधात ‘चाइल्ड लाइन’मध्येही तक्रार केली होती. गेल्या दोन महिन्यांपासून माझी मुलगी खूप अस्वस्थ होती. ती कोणाशी जास्त बोलत नव्हती. तिने आमच्या नातेवाइकांच्या घरी लग्नसोहळ्यात २४ नोव्हेंबरला मावस भावासोबत फोटो काढले होते. हे फोटो सोशल मीडियावर अपलोड केले. त्यावरून सोहेल याने त्याला देखील मेसेज करून शिवीगाळ केली होती. याबाबत माझ्या भाच्याने मला सांगितले होते. तसेच माझ्या भावाच्या मुलीला देखील माझ्या मुलीने सांगितले होते की, ‘सोहेल मला त्रास देत आहे. तो माझ्याशी नेहमी भांडतो. त्यानंतर २५ नोव्हेंबरला माझ्या मुलीने घरामध्ये आत्महत्या केली,’ असे तक्रारीत म्हटले आहे. या प्रकरणी काल, शुक्रवारी रात्री उशिरा तोफखाना पोलीस ठाण्यात गुन्हा दाखल करण्यात आला असून, आरोपीला अटक करण्यात आली आहे.
