पुणे (प्रतिनिधी सुनिल भोसले) – शहरातून वाहने, दागिने लंपास होण्याचे प्रमाण वाढले असतानाच आता फिरते शौचालयच चोरीला गेल्याचा प्रकार उघडकीस आला आहे. यापूर्वी पिंपरी-चिंचवड शहरामधून दोन वेळा फिरते शौचालय चोरीला गेले होते. त्यातील एक काही महिन्यांनी शहराच्या दुसऱ्या बाजूला आढळून आले होते. त्यानंतर आता पुन्हा निगडी-तळवडे रस्त्यावरून शौचालय चोरीला गेले आहे.
पिंपरी-चिंचवडमधून दररोज वाहन चोरी होते. तसेच घरफोडी, सोनसाखळी हिसकावणे यासासारख्या घटनांतही वाढ झाली आहे. निगडी-तळवडे रस्त्यावरील चिकन चौकातून ४ डिसेंबरला सकाळी फिरते शौचालय चोरीला गेले आहे. याप्रकरणी महेश नानासाहेब आढाव (वय ४२, रा. आनंदनगर, जुनी सांगवी) यांनी सोमवारी (७ डिसेंबर) निगडी पोलीस ठाण्यात फिर्याद दिली आहे. त्यानुसार पोलिसांनी अज्ञात चोरट्यांच्या विरोधात गुन्हा दाखल केला आहे.
पोलिसांनी दिलेल्या माहितीनुसार, पिंपरी-चिंचवड महापालिका आरोग्य विभागाकडून शहरात विविध ठिकाणी फिरते शौचालय ठेवण्यात आले आहेत. निगडी येथील चिकन चौकाजवळ देखील एक फिरते शौचालय ट्रॉली ठेवण्यात आली होती. ३ डिसेंबरला दुपारी सव्वातीन ते ४ डिसेंबर सकाळी सात या कालावधीत अज्ञात चोरट्यांनी ९५ हजार रुपये किमतीची शौचालय ट्रॉली चोरून नेली आहे. निगडी पोलीस याप्रकरणी अधिक तपास करीत आहेत.
