वर्धा (जिल्हा प्रतिनिधी मनोज बाचले) – विविध राज्यांमध्ये चोरी व घरफोडीचे ५० गुन्हे दाखल असलेल्या एका अट्टल घरफोड्याने जामीनावर बाहेर पडताच तब्बल ३० लाखांची घरफोडी केली. त्याने आपल्या साथीदारांसह पन्नासे ले आऊटमध्ये केलेल्या घरफोडीच्या गुन्ह्याची पोलिसांनी उकल केली आहे.
राम मडावी (रा. कोंढाळी) असे या अट्टल घरफोड्याचे नाव आहे. तो सध्या फरार असला तरीसुद्धा त्याचे दोन साथिदार मयुर भास्करराव बाबळे (रा. जयताळा) आणि विनोद बिसनरावजी कुंभरे (रा. सालई, कोंढाळी) यांना अटक करण्यात पोलिसांना यश आले आहे.
रामखेरीज या गुन्ह्यातील अन्य एक आरोपी अक्षय वरुडकर (रा. कोंढाळी) हासुद्धा फरार आहे. ही घटना सोनेगाव पोलीस ठाण्याच्या हद्दीतील पन्नासे ले-आऊट परिसरात ८ डिसेंबरच्या मध्यरात्री घडली. या प्रकरणातील फिर्यादी तिमापुरम गुणकेसर रेड्डी (वय ६१) हे आपल्या कुटुंबासह गोवा येथे फिरायला गेले असताना ही घरफोडी झाली. त्यांच्या घरातून ५० हजार रुपये रोख आणि हिरे व सोन्याचे दागिने असा एकूण ३० लाख ४७ हजार रुपयांचा ऐवज चोरीला गेला होता.
या प्रकरणी सोनगाव पोलिसांनी गुन्हा दाखल करून आरोपींचा शोध सुरू केला होता. गुन्हे शाखेचे पोलीस निरीक्षक किशोर पर्वते, गणेश पवार, संकेत चौधरी, राजकुमार त्रिपाठी, बलराम झाडोकर, धर्मदास सावरकर, वसंता चौरे, शंकर शुक्ला आदींनी या प्रकरणाचा समांतर तपास सुरू केला. यादरम्यान पोलिसांनी परिसरातील सीसीटीव्ही कॅमेऱ्यांचे फुटेज तपासले. तसेच गोपनीय माहितीच्या आधारावर मयुर व विनोद यांना ताब्यात घेऊन चौकशी केली. दोघांनी चोरीची कबुली दिली. पोलिसांनी त्यांच्याकडून ४ हजार ९०० रुपये रोख आणि २० लाख ५० रुपयांचे दागिने व दोन मोबाईल असा एकूण २० लाख ६१ हजार ९०० रुप
यांचा मुद्देमाल जप्त केला, अशी माहिती अतिरिक्त पोलीस आयुक्त सुनील फुलारी यांनी पत्रकार परिषदेत दिली. यावेळी पोलीस उपायुक्त लोहित मतानी, गजानन राजमाने, सहाय्यक आयुक्त सुधीर नंदनवार आदी उपस्थित होते.राम मडावीविरुद्ध महाराष्ट्र, गुजरात, मध्यप्रदेश अशा विविध राज्यात ५० गुन्हे दाखल करण्यात आले आहेत. आठ दिवसांपूर्वी तो घरफोडीच्या एका गुन्ह्यातून जामीनावर कारागृहाबाहेर आला. तेव्हापासून तो विविध वस्त्यांमध्ये बंद असलेल्या घरांची रेकी करीत होता. त्यावेळी त्यांना रेड्डी यांचे घर अनेक दिवसांपासून बंद असल्याचे दिसले. त्याने संधी साधून इतरांच्या मदतीने घरफोडी करून लाखो रुपयांचा मुद्देमाल लंपास केला.
