वर्धा (जिल्हा प्रतिनिधी मनोज बाचले) – ‘तुमच्या मुलाला भूतबाधा झाली, त्यामुळेच तो सतत आजारी असतो’, असे सांगून ती उतरवून देण्याच्या नावाखाली एका महिलेकडून पैसे उकळणाऱ्या महिला तांत्रिकावर गुन्हा दाखल करण्यात आला.
अखिल भारतीय अंधश्रद्धा निर्मूलन समितीच्या तक्रारीच्या आधारावर एमआयडीसी पोलिसांनी ही कारवाई केली.
शबाना सौदागर (रा. वानाडोंगरी) असे या महिला तांत्रिकाचे नाव आहे. माया फुलमाळी (६०, रा. दीपकनगर) या स्वयंपाकाची कामे करतात. त्यांचा मुलगा नितीन सातत्याने आजारी असतो. माया यांच्या एका नातेवाइकाने त्यांना शबाना यांचे नाव सुचविले. त्या अशा आजारांवर जडीबुटींच्या सहाय्याने उपचार करतात, असे त्यांना कळले. त्यामुळे त्यांनी शबानाची भेट घेतली. मात्र, शबानाने भूतबाधेची भीती दाखवत माया यांना ४ हजार रुपयांची मागणी केली.
शबानाने त्यांना राख आणि उर्दूत काहीतरी लिहिलेली चिठ्ठी टाकून पाणी दिले. ते नियमित पिण्याची सूचना केली. वेळोवेळी त्यांनी माया यांच्याकडून उपचाराच्या नावाखाली पैसे उकळले. तसेच तुमच्या घरात गुप्तधन असल्याचेही त्यांना सांगितले. त्यासाठीही शबाना पैसे मागू लागली. आपली फसगत होत असल्याचे माया यांच्या लक्षात आल्यावर त्यांनी अंनिसच्या कार्यकर्त्यांशी संपर्क साधला. अंनिसने पुढाकार घेऊन पोलिस ठाणे गाठले. पोलिसांनी या प्रकरणी शबानावर जादूटोणाविरोधी कायद्यान्वये गुन्हा दाखल केला.
