इस्लामपूर (जि. सांगली) – येथील स्पर्धा परीक्षा केंद्रात पोलिस भरतीची तयारी करणाऱ्या तरुणीवर स्पर्धा परीक्षांचा अभ्यास करणाऱ्या तरुणाने बलात्कार केला. रविवारी रात्री उशिरा हा प्रकार घडला. पीडित तरुणीच्या फिर्यादीनुसार याप्रकरणी मनोज कांबळे (रा. खरसुंडी, ता. आटपाडी) याला पोलिसांनी सोमवारी अटक केली. इस्लामपूर पोलिसांकडून याबाबत अधिक तपास सुरू आहे.
पोलिसांनी दिलेल्या माहितीनुसार, आटपाडी तालुक्यातील तरुणी इस्लामपूर शहरातील एका अॅकॅडमीत पोलिस भरतीसाठी अभ्यास करते. मनोज कांबळे हा त्याच अकॅडमिक स्पर्धा परीक्षांचा अभ्यास करतो. मनोजने ओळख वाढवून तिच्याशी मैत्री करण्याचा प्रयत्न केला.
रविवारी दुपारी त्याने तरुणीचा मोबाइल जबरदस्तीने काढून घेतला. मोबाइल हवा असेल तर रात्री माझ्या खोलीवर ये, असे त्याने सांगितले. मोबाइल आणण्यासाठी तरुणी रात्री मनोजच्या खोलीकडे गेली. खोलीच्या दरवाजातूनच तिने मोबाइल परत मागितला. याचवेळी मनोजने तिला जबरदस्तीने खोलीत ओढून दरवाजा आतून बंद केला. यानंतर जबरदस्तीने तिच्यावर बलात्कार केला. त्याने या सर्व प्रकाराचे मोबाइलमध्ये चित्रीकरण केले. याबाबत कोणाला सांगितल्यास मोबाइलमधील व्हिडिओ आणि तिचे फोटो व्हायरल करण्याची धमकी दिली.
घाबरलेल्या पीडित तरुणीने तिच्या खोलीवर पोहोचल्यानंतर घडलेला प्रकार मैत्रिणींना सांगितला. सोमवारी सकाळी स्पर्धा परीक्षा केंद्राच्या संचालकांना भेटून मनोजच्या दुष्कृत्याची माहिती दिली. यानंतर स्पर्धा परीक्षा केंद्राच्या संचालकांनी तिला धीर देत पोलिसात तक्रार देण्याचा सल्ला दिला. यानुसार पीडित तरुणीने मनोज कांबळे यांच्या विरोधात इस्लामपूर पोलिस ठाण्यात फिर्याद दाखल केली. पोलिसांनी घटनेचे गांभीर्य ओळखून तातडीने संशयित कांबळे यांना अटक केली. कोर्टात हजर केले असता त्याला शनिवारपर्यंत पोलिस कोठडी सुनावण्यात आली.
