नोएडा – यूट्युबरने एका महिलेवर बलात्कार केल्याची धक्कादायक घटना नोएडात उघडकीस आली आहे. इतकेच नाही तर, आरोपीने बलात्काराच्या घटनेचा व्हिडिओ काढून तो सोशल मीडियावर शेअर केला. राजीव कुमार असे त्याचे नाव असून, त्याला कोर्टात हजर केले असता, १४ दिवसांची न्यायालयीन कोठडी सुनावली आहे.
रिपोर्टनुसार, नोएडा सेक्टर ७६मध्ये राहणाऱ्या पीडितेने सेक्टर ३९मधील पोलीस ठाण्यात तक्रार दाखल केल्यानंतर ही घटना उजेडात आली. महिलेच्या तक्रारीनुसार, तिला गुंगीचे औषध देऊन बलात्कार केला. त्यानंतर त्याचा व्हिडिओ काढला. हा व्हिडिओ सोशल मीडियावर व्हायरल करण्याची धमकी देऊन तिला ब्लॅकमेल केले. त्यानंतर तो व्हिडिओ सोशल मीडियावर शेअर केला.
पोलिसांनी सांगितले की, महिलेने याबाबत नोएडा सेक्टर ३९ पोलीस ठाण्यात ऑक्टोबरमध्ये तक्रार दाखल केली होती. सोशल मीडियाच्या माध्यमातून तिची त्याच्यासोबत मैत्री झाली होती. त्याने सेक्टर ३९ मध्ये भेटण्यासाठी बोलावले. त्यानुसार ती गेली. तिथे त्याने गुंगीचे औषध दिले. यात ती बेशुद्ध झाली. आरोपीने तिच्यावर बलात्कार केला. त्यानंतर घटनेचा व्हिडिओ काढला, असे पीडितेने तक्रारीत म्हटले आहे. राजीव याने व्हिडिओ व्हायरल करण्याची धमकी देऊन ब्लॅकमेल केले आणि जवळपास १३ लाख रुपये उकळले, असा आरोपही तिने तक्रारीत केला आहे. शुक्रवारी आरोपीला अटक केली.
