सांगली (प्रतिनिधी शरद मोरे) – सांगलीतील गावभाग परिसरात एका सोनाराकडे काम करणाऱ्या कारागिराने साडेचार लाख रुपये किंमतीची सोन्याची लगड घेऊन पोबारा केला. याबाबत सोनार प्रशांत अनिल जाना (वय ३६, सध्या रा. गावभाग, सांगली, मूळ रा. पश्चिम मिदनापूर, पश्चिम बंगाल) यांनी सांगली शहर पोलीस ठाण्यात फिर्याद दाखल केली. या फिर्यादीनुसार पोलिसांनी तरुण दयाल मोदी (सध्या रा. गावभाग, सांगली) याच्यावर गुन्हा दाखल केला.
याबाबत अधिक माहिती अशी की, फिर्यादी प्रशांत जाना हे मूळचे पश्चिम बंगालमधील सराफ कारागीर आहेत. यांचे गावभाव परिसरात दागिन्यांवर कलाकुसर करून देण्याचे दुकान आहे. या दुकानात वर्षभरापासून तरुण मोदी हा काम करीत होता. गावाकडचा आणि परिचयातील असल्याने तरुण मोदी याच्यावर सराफ प्रशांत यांनी विश्वास ठेवला होता. रविवारी रात्री इतर कारागिरांसोबत तरुण मोदी दुकानात कामासाठी थांबला होता. रात्री नऊच्या सुमारास तो दुकानातून बाहेर पडला. दुसऱ्या दिवशी सकाळी सराफ प्रशांत जाना यांनी दुकानातील ड्रॉव्हर उघडताच त्यातील १०२ ग्रॅम वजनाची सोन्याची लगड त्यांना दिसली नाही. त्यांनी तातडीने याबाबत इतर कारागिरांकडे चौकशी केली. मात्र, लगड मिळाली नाही. यानंतर त्यांनी दुकानातील सीसीटीव्ही फुटेजची तपासणी केली असता, रात्री नऊच्या सुमारास तरुण मोदी हा ड्रॉव्हरमधील सोन्याची लगड घेऊन गेल्याचे दिसले.
सराफ प्रशांत यांनी मोदी याच्या मोबाइल नंबरवर संपर्क साधण्याचा प्रयत्न केला. पण त्याचा मोबाइल बंद होता. प्रशांत यांनी सोमवारी रात्री सांगली शहर पोलिसांत फिर्याद दाखल केली. कारागीर तरुण मोदी याने दुकानातील ड्रॉव्हरमधून साडेचार लाख रुपये किमतीची सोन्याची लगड लंपास केल्याचा उल्लेख त्यांनी फिर्यादीत केला आहे. सीसीटीव्ही फुटेजच्या आधारे सांगली शहर पोलिसांकडून कारागीर तरुण मोदी याचा शोध सुरू आहे.
