पुणे (प्रतिनिधी सुनिल भोसले) – शिक्षण संस्थाचालकांकडे एक लाख रुपयांची खंडणी मागून त्यातील तीस हजार रुपये घेणाऱ्या मनसेच्या पुणे जिल्हा संघटकास पिंपरी- चिंचवड खंडणीविरोधी पथकाने अटक केली आहे. अभय अरुण वाडेकर (रा. चाकण, ता. खेड, जि.पुणे) असे खंडणीच्या गुन्ह्यात अटक केलेल्याचे नाव आहे. त्याच्यासह सात ते आठ कार्यकर्त्यांवर गुन्हा दाखल करण्यात आला आहे.
या प्रकरणी महेंद्र इंद्रनिल सिंग (वय ५१, रा. भोसरी, पिंपरी-चिंचवड) यांनी फिर्याद दिली आहे. सिंग यांची वाकी खुर्द, चाकण (ता. खेड, जि. पुणे) येथे प्रियदर्शिनी इंग्लिश मिडियम स्कूल आहे. गेल्या महिन्याच्या २७ तारखेला वाडेकर हा सिंग यांच्या शाळेत गेला. लॉकडाऊन असतानाही विद्यार्थ्यांच्या पालकांकडून जास्त शुल्क का आकारले, अशी विचारणा केली.
‘आम्ही आंदोलन करून तुमच्या शाळेची बदनामी करू, असे त्याने धमकावले. ते होऊ द्यायचे नसेल, तर एक लाख रुपये द्यावे लागतील,’ असे त्याने सांगितले. आपल्या एका कार्यकर्तीच्या मुलीची फी सुद्धा घेऊ नको, असे सुद्धा बजावले. पाच हजारांचा पहिला हफ्ता पहिल्याच भेटीत त्याने घेतला. नंतर ७ तारखेला चाकणला आंबेठाण चौकात सिंग यांच्याकडून त्याने २५ हजार घेतले. यावेळी यापेक्षा अधिक पैसे देऊ शकणार नाही, असे सिंग म्हणाले.
त्यावर शाळेची बदनामी करण्याची पुन्हा धमकी वाडेकरने दिली. एवढेच नाही, तर उर्वरित पैशासाठी त्याने पुन्हा फोन केला. यानंतर मात्र सिंग यांनी पोलिसांत धाव घेतली. त्यानंतर चाकण पोलिस आणि खंडणी विरोधी पथक समांतर तपास करीत होते. यावेळी खंडणी विरोधी पथकातील सहायक निरीक्षक अनिल लोहार यांना खबऱ्याकडून आरोपी चाकण परिसरातच असल्याची माहिती मिळाली. त्यानुसार वरिष्ठ निरीक्षक उत्तम तांगडे, सहायक निरीक्षक लोहार यांच्यासह पथकाने आरोपीला अटक करून चाकण पोलिसांच्या हवाली केले आहे. चाकण पोलिस तपास करीत आहेत.
