लखनौ – उत्तर प्रदेशच्या कानपूरमध्ये हृदय पिळवटून टाकणारी घटना घडली आहे. माथेफिरू पित्यानं आपल्या पोटच्या तीन वर्षांच्या मुलाला फरशीवर आपटून त्याची हत्या केली. मुलानं रात्री झोपेत असताना अंथरूणात लघुशंका केली इतकाच त्याचा दोष होता. हत्येनंतर मुलाचा मृतदेह घेऊन आरोपी हा कुटुंबीयांना घेऊन आपल्या मूळ गावी हमीरपूरमध्ये गेला होता. पोलिसांनी आरोपीला अटक करून मृतदेह ताब्यात घेतला असून, विच्छेदनासाठी रुग्णालयात पाठवला आहे.
मूळचा हमीरपूर येथील संतराम प्रजापती हा मजुरीचे काम करतो. संतराम हा घाटमपूर पोलीस ठाण्याच्या हद्दीत एका वीट भट्टीवर काम करत होता. पत्नी अनिता, मुलगी अंजना आणि खुशबू, मुलगा रवींद्र यांच्यासोबत तो राहत होता. संतराम याने कुटुंबीयांना धमकावले होते. हत्येबाबत कुणाकडे वाच्यता केली तर, अख्ख्या कुटुंबाला ठार करेन, अशी धमकी त्याने दिली होती.
संतरामच्या तीन वर्षांच्या मुलानं मंगळवारी रात्री झोपेत असताना अंथरुणात लघुशंका केली होती. त्यामुळे रागावलेल्या संतरामने त्याला निर्दयीपणे मारहाण केली. त्यानंतर त्याला जमिनीवर आपटलं. यात त्याचा मृत्यू झाला. संतराम मृतदेह घेऊन कुटुंबीयांसह आपल्या छानी गावात परतला. बुधवारी त्याच्या पत्नीने आपल्या भावाला सर्व हकिकत सांगितली. त्यानंतर घाटमपूर पोलीस ठाण्यात याबाबत तक्रार दिली. पोलिसांनी आरोपीला अटक केली. त्यानंतर त्याच्याविरोधात हत्येचा गुन्हा दाखल केला.
