पुणे (प्रतिनिधी सुनिल भोसले) – पुण्यातील इंदापूर पोलीस ठाण्याच्या हद्दीत धक्कादायक घटना घडली. मुंबईतील कुटुंबीय कारमधून या परिसरातून जात असताना, लघुशंकेसाठी त्यांनी कार थांबवली. त्याचवेळी चोरट्यांनी त्यांना शस्त्रांचा धाक दाखवून लुटले. या प्रकरणी इंदापूर पोलीस ठाण्यात गुन्हा नोंदवण्यात आला आहे.
इंदापूर पोलीस ठाण्याच्या हद्दीत मंगळवारी दुपारच्या सुमारास लुटमारीची घटना घडली. या प्रकरणी अंकुश काळे यांनी पोलीस ठाण्यात चार जणांविरोधात तक्रार केली आहे. मिळालेल्या माहितीनुसार, मुंबईतील गोरेगावचे रहिवासी अंकुश काळे हे काही कामानिमित्त इंदापूर परिसरातून कारने जात होते. त्यांच्यासोबत आई-वडील आणि भाऊ होते. दुपारी साधारण तीन वाजताच्या सुमारास या परिसरातून जात असताना, त्यांनी लघुशंकेसाठी कार थांबवली. काही कळण्याच्या आत चार जण आले आणि त्यांनी कारची चावी हिसकावून घेतली. शस्त्रांचा धाक दाखवून मारहाण केली.
हे कुटुंबीय कारमधून जात असताना, इंदापूर परिसरात त्यांनी लघुशंकेसाठी कार थांबवली. त्यानंतर काही मिनिटांतच चौघे तेथे आले. त्यांच्याजवळ शस्त्रे होती. त्यांनी दमदाटी केली. धाक दाखवून रोकड, दागिने, घड्याळ, एटीएम कार्ड आणि इतर मुद्देमाल लुटून पोबारा केला. या प्रकरणी काळे यांनी इंदापूर पोलीस ठाण्यात चौघांविरोधात तक्रार दिली आहे. पोलिसांनी गुन्हा दाखल केला असून, तपास सुरू आहे.
