मुंबई (प्रतिनिधी हितेश मिस्त्री) – फॅशनेबल आणि महागडे कपडे घालून मॉल, शॉपिंग सेंटर, पार्लरमध्ये फिरून श्रीमंत महिलांच्या पर्स चोरी करणाऱ्या ऑर्केस्ट्रा गायिकेला मुंबई गुन्हे शाखेच्या पथकाने बुधवारी अटक केली. अर्चना बरुआ उर्फ मुनमून हुसेन असे या महिलेचे नाव असून देशभरात चोरी करण्यासाठी ती विमानातूनच प्रवास करीत असल्याचेही चौकशीतून समोर आले आहे.
शिवाजी पार्क येथील लॅक्मे पार्लरमध्ये आलेल्या एका महिलेची दोन वर्षांपूर्वी पर्स चोरीस गेली.या पर्समध्ये दागिने, मोबाइल, रोख रक्कम असा सुमारे चार लाखांचा ऐवज होता. महिलेच्या तक्रारीवरून शिवाजी पार्क पोलिस ठाण्यात याप्रकरणी गुन्हा दाखल करण्यात आला. या पार्लरमधील सीसीटीव्ही फुटेज तपासले असता, एक महिला पर्स घेऊन जाताना दिसत होती. चेहरा स्प्ष्ट दिसत नसला, तरी त्या फुटेजच्या आधारे पोलिसांनी तिचा शोध सुरू केला.
तपासादरम्यान लोअर परळ येथील झारा शोरूममध्ये अशा प्रकारे पर्स चोरीच्या आणखी दोन घटना घडल्या. तेथील सीसीटीव्ही चित्रण पोलिसांनी तपासले, तेव्हा एकाच महिलेने तिन्ही ठिकाणी चोरी केल्याचे स्पष्ट झाले. वारंवार चोरीचे प्रकार घडत असल्याने गुन्हे शाखा युनिट पाचचे प्रभारी पोलिस निरीक्षक जगदीश साईल, निरीक्षक योगेश चव्हाण, सहायक निरीक्षक सुरेखा जवंजाळ, महेंद्र पाटील, अमोल माळी यांच्या पथकाने तपास हाती घेतला. सीसीटीव्ही फुटेज तसेच इतर तांत्रिक पुराव्यांच्या आधारे पोलिसांच्या पथकाने या महिलेचा ठावठिकाणा शोधून काढला. पोलिसांचे पथक बंगळुरू येथे गेले आणि या महिलेला ताब्यात घेतले. अर्चना बरुआ उर्फ मुनमून हुसेन असे नाव सांगणाऱ्या या महिलेने मुंबईत केलेल्या तीन गुन्ह्यांची कबुली दिली.
