खुलताबाद (प्रतिनिधी सलमान खान) – विदेशी फेसबुक मित्रावरील विश्वास एका महिलेस चांगलाच महागात पडला. दिवाळी सणानिमित्त महागडी भेटवस्तू देण्याचा बहाणा करत त्या भामट्याने महिलेची २१ लाख ५० हजार रुपयांची फसवणूक केली. हा धक्कादायक प्रकार गुरुवारी समोर आला असून, याप्रकरणी सिडको पोलिस ठाण्यात गुन्हा दाखल करण्यात आला आहे.
फिर्यादी महिला (वय ३७) सिडको पोलिस ठाणे हद्दीत राहते. खासगी नोकरी करणाऱ्या फिर्यादी महिलेची फेसबुकच्या माध्यमातून ७ नोव्हेंबर २०२०मध्ये लीचँग नामक भामट्याशी ओळख झाली. हा भामटा फिर्यादीशी फेसबुक मेसेंजरवरून संभाषण करत असे. मैत्री झाल्यावर त्याने जर्मनीत राहत असल्याचे सांगितले. पुढे त्याने व्हॉटस्अॅप क्रमांक देत त्याद्वारे फिर्यादीबरोबर संभाषण सुरू केले. दिवाळी सणादरम्यान भामट्याने फिर्यादीला गिफ्ट देतो असे सांगत ज्वेलरी, बूट, मोबाइल, पाँड करन्सी व इतर महागड्या वस्तूंचे फोटो पाठविले. त्यानंतर त्याने फिर्यादीचा घराचा पत्ता घेत तीन ते चार दिवसांत पार्सल येईल असे सांगितले.
तीन दिवसानंतर फिर्यादी महिलेस पार्सल सोडविण्यासाठी तीस हजार रुपये भरा, असा फोन आला. सोबत इंडसइंड बँकेचा खाते क्रमांकही देण्यात आला. खातेदाराचे नाव ब्रिजेश शुल्का असल्याचे सांगण्यात आले. फिर्यादीने त्यावर विश्वास ठेवत तीस हजार रुपयांचा भरणा केला. त्यानंतर विविध मोबाइल क्रमांक तसेच ई-मेल आयडीवरून फिर्यादीला फोन, संदेश येत राहिले. त्यात पार्सल बाहेरच्या देशातून आले असल्यामुळे वेगवेगळ्या कार्यवाही पूर्ण करावयाच्या आहेत. त्यासाठी विविध कागदपत्राची, प्रमाणपत्राची व शासकीय मान्यतेची आवश्यक भासणार आहे, अशी थाप भामट्यांनी मारत ते कागदपत्रे काढण्यासाठी फिर्यादीकडे पैशांची मागणी केली. त्यावर विश्वास ठेवत फिर्यादीने भामट्याने दिलेल्या बँक ऑफ इंडियाच्या खात्यावर २० लाख रुपये, तर इंडसइंड बँकेच्या खात्यावर दीड लाख रुपये असा एकूण २१ लाख ५० हजार रुपये वेळोवेळी भरले. ७ नोव्हेंबर ते ३० नोव्हेंबर दरम्यान ही आर्थिक फसवणूक करण्यात आली.
दरम्यान, फसवणूक झाल्याचे लक्षात येताच महिलेने सिडको पोलिसांकडे धाव घेतली. तक्रारीवरून लीचँगसह अन्य एका महिलेवर गुन्हा दाखल करण्यात आला आहे, अशी माहिती पोलिस निरीक्षक अशोक गिरी यांनी देत तपास सुरू असल्याचे सांगितले. दरम्यान, लाखो रुपयांना गंडा घातल्यानंतरही फिर्यादीला पैशांचा भरणा करण्याबाबत ‘एसएमएस’ येत असल्याचे तक्रारीत नमूद करण्यात आले आहे.
