नाशिक (विशेष प्रतिनिधी) – रेल्वेत नोकरी लावून देण्याचे आमिष दाखवून शहर वाहतूक शाखेतील पोलिसासह त्याच्या मित्राने दोघांना तब्बल १८ लाख रुपयांना गंडा घातला. या प्रकरणी पंचवटी पोलिस ठाण्यात गुन्हा दाखल करण्यात आला असून, अद्याप संशयितांना अटक झालेली नाही.
वाहतूक शाखेतील पोलिस रमेश मोतीगिरी गोसावी (रा. नाशिक) आणि सचिन भाऊसाहेब म्हस्के (रा. वैजबाभूळ, ता. पाथर्डी, जि. नगर) अशी संशयितांची नावे आहे. दोघांनी बाबाजी रामजी केदारे (रा. हनुमाननगर, पंचवटी) आणि त्यांचा भाचा स्वप्निल महेंद्र बागूल यांची फसवणूक केली. रेल्वेत नोकरी लावून देतो असे सांगून तशी बनावट ऑर्डर तयार करून संशयितांनी १ नोव्हेंबर २०१४ ते १२ मे २०१६ या कालावधीत मामा भाच्यांकडून प्रत्येकी ९ लाख असे १८ लाख रुपये उकळले. तसेच इस्टर्न रेल्वे, गव्हर्नमेंट ऑफ इंडिया या नावाने संशयितांनी टीसी पदाची बनावट ऑर्डर तयार करून दिली. फसवणूक झाल्याचे लक्षात येताच केदारे यांनी पैशांसाठी तगादा सुरू केला. मात्र, संशयिताने टाळाटाळ केली. अखेर, केदारे यांनी पंचवटी पोलिस ठाणे गाठून फिर्याद दिली. हा प्रकार जुना असून, फिर्याद दाखल करून घेण्यात आल्याचे वरिष्ठ पोलिस निरीक्षक अशोक भगत यांनी स्पष्ट केले.
