औरंगाबाद (प्रतिनिधी) – मोबाइल दुकान टाकण्यासाठी माहेरहून दोन लाख रुपये आणण्यासाठी वारंवार होणाऱ्या छळाला कंटाळून विवाहितेने गळफास घेत आत्महत्या केल्याची घटना २५ डिसेंबर रोजी दुपारी सादातनगर परिसरात घडली. या प्रकरणात विवाहितेला आत्महत्येस प्रवृत्त करणाऱ्या आरोपी पतीला सातारा पोलिसांनी शनिवारी पहाटे गजाआड केले.
मिर्झा अस्लम बेग सफदर बेग (२७, रा. सादातनगर) असे आरोपीचे नाव असून, त्याला २८ डिसेंबरपर्यंत पोलीस कोठडीत ठेवण्याचे आदेश प्रथम वर्ग न्यायदंडाधिकारी धनश्री भंडारी यांनी दिले. या प्रकरणात मयत रूफैदा यांचे वडील तफज्जूल महेमूद हुसेन खान (६२, रा. रशिदपुरा) यांनी फिर्याद दिली. त्यानुसार, रुफैदा यांचा विवाह ९ नोव्हेंबर २०१९ रोजी आरोपी मिर्झा अस्लम बेग याच्याशी झाला होता. लग्नाच्या महिन्यांभरानंतर रुफैदाला तिच्या पतीसह सासू नफिसा, नणंद सलमा बेगम आणि मोठा भाया उबेद बेग हे छोट छोट्या कारणावरून भांडण करून तुझ्या वडिलांनी लग्नात काही दिले नाही म्हणून शिवीगाळ करित होते. वारंवार होणाऱ्या त्रासामुळे मार्च मध्ये फिर्यादी व आरोपींची बैठक झाली. तेव्हा आरोपी मिर्झा अस्लम आणि त्याचा मोठा भाऊ मिर्झा उबेद यांनी मोबाइलचे दुकान टाकण्यासाठी दोन लाखांची मागणी केली. फिर्यादी एवढे पैसे नसल्याचे सांगत ५० हजार रुपये दिले. त्यानंतर पुन्हा आरोपींनी मोबाइल दुकान टाकण्यासाठी दोन लाख रुपये आण असा पुन्हा तगादा लावत विवाहितेचा छळ सुरू केला. त्यामुळे २० डिसेंबर रोजी फिर्यादी यांच्या भावाच्या घरी फिर्यादी व आरोपींची बैठक झाली. त्यात फिर्यादी यांनी दोन महिन्यांत तुम्हाला पैसे देतो, मात्र मुलीचा छळ करू नका, असे सांगितले असता आरोपींनी ते मान्य केले. मात्र, २५ डिसेंबर रोजी दुपारी पीडितेने फॅनला ओढणीच्या सहाय्याने गळफास घेत आत्महत्या केली.
प्रकरणात सातारा पोलिस ठाण्यात गुन्हा दाखल करण्यात आला. आरोपीला शनिवारी न्यायालयात हजर करण्यात आले असता सहायक सरकारी वकील समीर बेद्रे यांनी आरोपीच्या साथीदारांना अटक करणे आहे. आत्महत्या करण्यापूर्वी मयत आणि आरोपींमध्ये काही भांडण झाले होते का, याबाबत तपास करणे असल्याने आरोपीला पोलिस कोठडी देण्याची विनंती न्यायालयाकडे केली.
