लखनऊ – उत्तर प्रदेशातील लखनऊमध्ये धक्कादायक घटना घडली आहे. पत्नीने स्वयंपाक केला नाही म्हणून चिडलेल्या पतीने तिच्या गळ्यावर धारदार शस्त्राने सपासप वार केले. घटनेवेळी आरोपी पती दारुच्या नशेत होता. तो घटनेनंतर फरार झाला होता. पोलिसांनी त्याला अटक केली आहे. पोलिसांनी जखमी महिलेला रुग्णालयात दाखल केले. तिची प्रकृती चिंताजनक आहे. पोलिसांनी आरोपी पतीविरोधात गुन्हा दाखल केला आहे.
मिळालेल्या माहितीनुसार, लखनऊच्या विभूतिखंड परिसरातील भरवारामध्ये अमित सिंह आपली पत्नी गीतासोबत राहत होता. अमित हा सुरक्षा रक्षकाची नोकरी करतो. तो दररोज दारू पिऊन घरी येत होता. घटनेच्या दिवशीही तो दारूच्या नशेत घरी आला. स्वयंपाक करण्यावरून त्याने पत्नीसोबत वाद घातला. त्यानंतर भांडण वाढले. त्याने पत्नीच्या गळ्यावर धारदार शस्त्राने वार केले. पत्नी जमिनीवर कोसळल्यानंतर भानावर आलेला अमित तेथून पसार झाला.
शेजाऱ्यांनी या घटनेची माहिती पोलिसांना दिली. घटनास्थळी पोलीस पोहोचले. त्यांनी जखमी महिलेला ट्रामा केअर सेंटरमध्ये दाखल केले. तिची प्रकृती चिंताजनक आहे. पोलिसांनी गुन्ह्यात वापरलेले शस्त्र ताब्यात घेतले आहे. आरोपीविरोधात गुन्हा दाखल केला आहे. फरार आरोपी पतीला अटक केली आहे. पुढील तपास सुरू आहे.
