करौली (राजस्थान) – करौली जिल्ह्यात एका महिलेने आपल्या प्रियकराच्या मदतीने पतीची हत्या केली. या हत्येचा छडा लावत करौली पोलिसांनी दोन्ही आरोपींना अटक केली आहे. पोलिसांच्या माहितीनुसार, २५ डिसेंबर रोजी मासलपूर येथील नारायणा गावातील पुलियाजवळ एका व्यक्तीचा मृतदेह आढळला होता.
भैरो सिंह उर्फ बनवारी असे मृताचे नाव आहे. मृताच्या भावाने या प्रकरणी पोलिसांत तक्रार दाखल केली होती. त्यानंतर पोलीस अधीक्षक मृदुल कच्छावा यांनी विशेष पथकाची नेमणूक केली आणि घटनेचा तपास सुरू केला. पोलीस तपासात मृताची पत्नी हेमलता आणि तिच्या प्रियकराचे नाव समोर आले. या दोघांनी बनवारीला झोपेच्या गोळ्या आणि इंजेक्शन देऊन बेशुद्ध केले. त्यानंतर कपड्याच्या साह्याने तोंड दाबून त्याची हत्या केली. पोलिसांनी कसून चौकशी केली असता, दोघांनी गुन्ह्याची कबुली दिली.
पोलिसांनी दोन्ही आरोपींना अटक करून या गुन्ह्यात वापरलेली कार जप्त केली आहे. विशेष म्हणजे, हत्या केल्यानंतर पत्नीनेच २५ डिसेंबर रोजी कैलादेवी पोलीस ठाण्यात पती बेपत्ता झाल्याची तक्रार दाखल केली होती.
