पुणे (प्रतिनिधी सुनिल भोसले) – राज्यातील ग्रामपंचायत निवडणुकांच्या तारखा जवळ आल्या आहेत. प्रचारही शिगेला पोहोचला आहे. मात्र, आता वादही होऊ लागले आहेत. निवडणुकीसाठी उमेदवारी अर्ज भरला म्हणून तरुणाला लाथाबुक्क्यांनी मारहाण केल्याची घटना पुण्यातील भोर तालुक्यातील एका गावात घडला. या प्रकरणी पाच जणांविरोधात पोलीस ठाण्यात गुन्हा दाखल केला आहे.
भोर तालुक्यातील कापूरहोळ गावात काल, सोमवारी संध्याकाळी पाच ते सहा तरुणांनी एका तरुणाला बेदम मारहाण केली. ग्रामपंचायत निवडणुकीसाठी उमेदवारी अर्ज भरल्याच्या रागातून ही मारहाण झाली. या प्रकरणी तरुणाने पोलिसांत तक्रार दाखल केली आहे. पोलिसांनी तात्काळ कारवाई करत, राजगड पोलिसांनी पाच जणांविरोधात गुन्हा दाखल केला आहे.
तरुणाने ग्रामपंचायत निवडणुकीसाठी उमेदवारी अर्ज भरला होता. तो सोमवारी संध्याकाळी गावातीलच एका हॉटेलमध्ये होता. त्याचवेळी आरोपी त्या ठिकाणी आले. त्यांनी तरुणाला उमेदवारी अर्ज भरल्याबद्दल विचारणा केली. त्यानंतर त्यांच्यात वाद झाला. पाच ते सहा जणांनी तरुणाला शिवीगाळ केली. त्यानंतर लाथाबुक्क्यांनी आणि लाकडी बांबूने मारहाण केली. तरुणाने पोलिसांत तक्रार दाखल केल्यानंतर पाच तरुणांविरोधात गुन्हा दाखल केला आहे. या प्रकरणाचा अधिक तपास राजगड पोलीस करत आहेत.
