गोड्डा (झारखंड) – येथे महिला सरपंचाची गळा चिरून हत्या केल्याची घटना घडली. चंपा चौडे (वय ५६) असे महिला सरपंचाचे नाव आहे .घटनेची माहिती मिळाल्यानंतर पोलिसांचे पथक घटनास्थळी पोहोचले. घटनेचा तपास केला जात आहे. पोलीस सूत्रांच्या माहितीनुसार, या घटनेची चौकशी केली असता, काही पुरावे हाती लागले आहेत. तंत्रज्ञानाच्या मदतीने मारेकऱ्यांपर्यंत पोहोचण्याचा प्रयत्न आहे. लवकरच या हत्येचा छडा लावला जाईल, असा विश्वास पोलिसांनी व्यक्त केला.
बोआरीजोर पोलीस ठाण्याच्या हद्दीतील मोहला गावात ही खळबळजनक घटना घडली. घटनेची माहिती मिळाल्यानंतर एसडीपीओ के. के. सिंह हे देखील घटनास्थळी पोहोचले. त्यांनी घटनेची माहिती घेतली. महिलेची धारदार शस्त्राने गळा चिरून हत्या करण्यात आल्याचे पोलिसांनी सांगितले. मृतदेहाजवळ टॅब, बॅटरी आदी वस्तू होत्या. त्या पोलिसांनी ताब्यात घेतल्या आहेत. मृतदेह विच्छेदनासाठी रुग्णालयात पाठवण्यात आला आहे.
या घटनेचा पोलीस तपास सुरू आहे. मृत महिलेचा पती नीमू मरांडी यांच्या मृत्यूनंतर ती लहान बहिणीच्या घरी राहत होती. जवळपास १० ते १२ वर्षांपासून ती आपली बहीण मरांगमय चौडे हिच्या घरी राहत होती. सरपंचपदावरून तिचा वाद सावत्र मुलासोबत सुरू होता, अशी माहिती ग्रामस्थांनी पोलिसांना दिली. या हत्येच्या घटनेवरून ग्रामस्थांमधून संताप व्यक्त केला जात आहे. अशा प्रकारे महिला सरपंचाची हत्या होणे ही गंभीर बाब आहे. या घटनेची उच्चस्तरीय चौकशी करण्यात यावी, तसेच मारेकऱ्यांना लवकर अटक व्हावी, अशी मागणी ग्रामस्थांनी केली
