वर्धा (जिल्हा प्रतिनिधी मनोज बाचले) – बंदुकीतून छर्रा सुटल्याने एकाचा मृत्यू झाला. ही घटना गिट्टीखदान पोलिस ठाण्याच्या हद्दीतील दाभा चौक परिसरात शुक्रवारी दुपारी ३च्या सुमारास घडली.
लोकेश जंगलूजी गजभिये (वय ४२, रा. दाभा चौक) असे मृताचे नाव आहे. त्याचा मित्र पंकज पाणी (वय ४०, रा. दाभा चौक) याने ही छर्रा गोळी झाडल्याने लोकेश यांचा मृत्यू झाला. लोकेशचा मित्र पंकजने छर्रा बंदूक विकत घेतली. ती लोकेशला दाखवण्यासाठी त्याच्या घरी गेला होता. त्यावेळी लोकेश बंदूक चालते कशी, हे दाखवण्याची विनंती करीत होता. त्यावेळी पंकज हा बंदुकीत छर्रा भरायला गेला. पण, त्यापूर्वीच एक छर्रा बंदुकीत फसला. त्यामुळे दुसरा छर्रा जात नव्हता. बंदूक बिघडली, असे पंकजला वाटले. छर्रा जात नसल्याने केवळ आवाज ऐकवण्यासाठी त्याने बंदूक लोकेशच्या दिशेने ताणली व घोडा दाबला.
यावेळी फसलेला छर्रा निघून थेट लोकेशच्या डाव्या डोळ्यातून डोक्यात घुसला. यामुळे तो जखमी होऊन जमिनीवर कोसळला. पंकजने लोकेशला लगेच रुग्णालयात दाखल केले व पोलिसांना घटनेची माहिती दिली. डॉक्टरांनी तपासून लोकेशला मृत घोषित केले. याप्रकरणी पोलिसांनी सदोष मनुष्यवधाचा गुन्हा दाखल करून पंकजला अटक केली.
