नवी मुंबई (प्रतिनिधी विरेंद्र म्हात्रे) – पनवेल महापालिकेचे आयुक्त सुधाकर देशमुख यांच्या नावाने खोटे फेसबुक खाते उघडून त्यावरून पैशाची मागणी केली जात असल्याचा प्रकार समोर आला आहे. पनवेल शहर पोलिस ठाण्यात या प्रकाराची तक्रार केल्यानंतर संबंधित खाते बंद करण्यात आले.
सुधाकर देशमुख या नावाने खोटे फेसबुक अकाऊंट उघडून संबंधित अकाऊंटच्या माध्यमातून पैशांची मागणी केली जात होती. आयुक्तांच्या निकटवर्तीयांनी त्यांना फोन करून याबाबत विचारणा केल्यानंतर ही बाब उघड झाली. आयुक्तांच्या मित्राकडूनच पैशाची मागणी झाल्यामुळे हा प्रकार समोर आला. आयुक्तांनी तातडीने ही बाब पनवेल शहर पोलिस ठाण्याचे वरिष्ठ पोलिस निरीक्षक अजय लांडगे यांच्या निदर्शनास आणून याबाबतची तक्रार केली. पोलिसांनी तातडीने या खात्याचा छडा लावून ते ब्लॉक केले.
माझ्या नावे इन्स्टाग्राम व फेसबुकवर पैशांची मागणी करणाऱ्या मेसेजना प्रतिसाद देऊ नये असे आवाहन आयुक्तांनी सोशल मीडियावर मेसेजद्वारे केले आहे. आयुक्तांचे छायाचित्र असलेले खाते ब्लॉक करून गुन्हा नोंदविण्यात येत असल्याची माहिती वरिष्ठ पोलिस निरीक्षक अजय लांडगे यांनी दिली.
